ZALEN August 22, 2023 : August 21, 2023-a Manipur University hnuaia Rayburn College zirlai Undergraduate exam te result social media-a darh chungchangah Rayburn College, Churachanpur, Manipur Principal Rev. Dr. Khen P. Tombing chuan thuchhuah a siam a, an hriat chin a sawi.

Rayburn College atanga 5th Semester Examination, 2022 result chhuaka Department of Psychology-ah zirlai 76 atangin zirlai 10 chiahin an subject an cleared tih hi a dik.

Rayburn College zirlai engemaw zat, 2nd leh 4th Semester Eaxmination 2022-ah khan subject hrang hrang-ah 'zero/no marks' pek an nih thu tarlan hi a dik.

5th Semester Examination 2022 result chhuaka Psychology zirlai 10-in an paltlang tih leh Mi panga ten 4th Semester Examination, 2022 Zoology-a pass te Meitei vek anga tarlan hi a dik lo a, heng pass te hi Zo ethnic te an ni, a ti.

College thuneitute chuan Manipur University thuneitute chu a awmzia sawifiah turin Rayburn College Principal hian a phut bawk a ni.

Manipur University hnuaia awm Rayburn College, New Lamka-ah hian BA Psychology zirlai hi 76 an awm a, 10 chiah an pass. Zirlai ten Comptroller of Examination, MU hnena complaint an neih hnuah result hi darkar hnih hnuah update niin Rayburn College atanga zirlai pass hi 41 an ti leh a, mahse, marksheet hi download theih tura dah a la ni lo. Zirlai te hian an marksheet hmasa hi an download hman a, tunah hian an marksheet thar tur hi download turin an nghak mek niin sawi a ni. 

BA Psychology final result hi Manipur state-ah hian an neih vawikhatna a ni a, New Lamka-a Rayburn College hi he subject nei awmchhun a ni.