Aizawl September 9, 2022 : Zirtawpni hian Mizo Hnam Run-ah MNF chhung inkhawm neih a ni a, Minister Lalruatkima, MNF Adviser chuan Sawrkar-in Assembly koh hlan a nghakhlel a, dan siam that ngai siam that nan te, dan siam thar ngai siamna hun atan Assembly session neih hun an nghakhlel tih sawiin, CM Car lei chungchang leh Land Revenue bill thar thingtlang tan a hlut tur thu a sawi.

CM car hman tur lei chungchang a sawinaah Lalruatkima chuan, "Congress sorkar lai khan Motor thar lei thuah khatih laia CM khan, 'Vawi khat pawh budget la pharh lo hian motor lei chungchang hi lo sawisel ve tawh suh u,' a ti a, 'Sawrkarin Motor hi tul loah lei a ni ngai lo,' a ti. Kum 2018 inthlan dawnah ZPM hotuten an MLA candidate te an kokhawm a, 'MLA hamthatna dawn zinga mi Car leina (nuai 10) ka la lo ang, MLA hlawh pung la lo turin ka intiam e,' tiin an intiam tir. Assembly Secretariat-ah MLA Car leina la hmasaber zawh a ni a, ‘Lalduhoma’ tih chu chhanna a ni," a ti. 

MNF Adviser chuan Session neih zawh takah, House a pharh tak ‘The Mizoram (Land Revenue) (Amendment) Bill, 2022' chu mi retheite tana tha tur zawk a ni tih sawiin, "House-a Amendmend siam tam zawk hian mi retheite a neksawr ngai lo. Opposition MLA House atanga chhuaktau daih khan a chhiar chian loh vang a ni a, ‘Property card kha ka bialah rawn ti vat vat u la,’ titu tur kha a chhuak daih mai a, a hriat lohzia a inhre lo a ni," a ti. "Congress sorkar khan Mizoram Land Revenue Rules 2017 an siam a, Act ah an lo siam reng reng lova. Anmahni hun laia siam, dan anga siam danglama mipuite leh sawrkar tana tha tura ruahman a ni. A mual boin an bo," a ti bawk.

Ruatkima chuan, “Legislator ten Dan kan siam a, chumi behchhan chuan Court in thutlukna a siam thin. ‘Court-ah kan chak leh chuang lovang’ ti a, Dan siamtu aia court kha thunei zawka ngai House chhungah an awm tlat a. Chief Minister ni ta se khuar khurumah min tlak pui ang tih hlauhawm khawpin a bo tlat a ni,” a ti.

RD minister chuan, "BADP hna atangin 25% hi in ei em ni? tiin opposition MLA kha a rak dar dar a. 25% hi ei tur a awm lo, lak tur pawh a awm lo. Sevadal training chhuak zawhna, dawt 100 i sawiin pakhatin an awih pawhin a hlawk tho, tih ang chi hi chu tunlai khawvelah an ching tawh lo," a ti.

House pass dilna Minister kaltlanga tih ngai chungchang sawi langin, Ruatkima chuan, "Congress sawrkar laia kalpui tawh anga kalpui zel a ni. Surveyor indaih ni ila kan thlah zalen thei reng a ni," a ti.

Ruatkima chuan MNF sawrkar hnuah Zirtirtu 3000 (MR+SEDP) chuang lak an ni tawh tih sawi langin, Two Wheeler taxi permit 3000 vel pek chhuak a ni tawh, a ti. "Mi thahnem tak tan eizawnna kan siam der tawh tihna a ni. Pathian in kan sorkar min veng a, Sawrkar hnathawk hlawh pawh a hun takah release a ni leh mai dâwn. Tampui mitthi ang maia kum hnih zet hripui leng karah pawh buhfai lamah harsatna kan tawk lo. Tun hnaiah Mizoramin ‘Best Agriculture State in North East India Award’ kan dawng a, Delhi lamah kan Agriculture Minister-in Union Minister hnenah a dawng dâwn. Kan Minister leh kan sorkar hian thawk tha lo ni ila he lawmman hi kan dawng hauh lovang. A ṭha ber in ni e tia min thlangtu hi Ministry of Agriculture a ni tlat," a ti.

2023-ah Pathian leh Mipuite zarah an sawrkar leh ngei a ring tih sawiin, "Opposition hovin, ‘CM hi a tla ang, a bial a buai em mai’ an ti a. Mahse, inkhelhnaah pawh inchuh buaina karah zel lawm kan pet goal thin le," a ti.