Aizawl: Chief Minister Zoramthanga chuan nimin zing khan ZOHANDCO building, Chaltlang Lily Vengah ZOHANDCO Sales Emporium chu a duh apiang dawr theihin a hawng. Remna leh Muanna chu langsar se a duh thu a sawi.

Chief Minister Zoramthanga chuan handloom leh handicrafts kutchhuak mawi leh tha tak tak te phochhuak a zawrhna hmun tha tak hawn thar leh a ni chu lawmawm a ti a. Hnam humhalh kawngah heng kan puan tah leh thiam hnang dehtute kutchhuak hi chawilar thiam a pawimawh thu a sawi. Chief Minister chuan, "Culture hi a thang in, a insiam danglam zel a. Chu chuan kan hnam inthuam te, kan tawng te, thu leh hla, khawtlang nunphung, ei leh in te a keng tel vekin, hnam puitling apiang an culture a hausa. Kan nitin nunah kan hnam ziarang tilang theitu kan nunah bet tlat in, hnamdang pawhin an rawn hmuh theih a kan chawilar thiam pawimawh," a ti. Langsar ber tura a duh chu remna leh muanna, remna siamtu nihna hi ni se, a ti 

ZOHANDCO leh corporation thenkhat te chu economy lam thlira chhan tha tak takte avanga chawlhtir a ni a, hmabak tha tak neia an hriat avangin tundin leh sawrkarin tha a tih avanga tundin leh a nih thu Chief Minister chuan a sawi. Hnam thuam leh kutchhuak hrang hrang chawisanna atan leh puan tah leh thiam hnang duh lama eizawngtute eizawnna tihhmasawn kawngah an pawimawh thu a sawi.

ZOHANDCO hi kum 2019 khan dinthar leh niin, tunah hian Chairman chu C. Lalrammawia a ni a. Managing Director Pu Benjamin Lalzama niin, ani hian vawiin Sales emporium hawnna inkhawm hi a kaihruai a ni. Board of Directors ah mi 9 an awm a, office ah hian thawktu 19 an awm.