Aizawl : Mimin khan Law and Judicial Minister TJ Lalnuntluanga chuan a bial chhung khua Dilkawn, Kelkang leh Bethel Veng Champhai te tlawhin Sawrkar Department hotute nen mipuite kawmin an mamawh leh harsatnate an enfiah sak a ni.

Heng khua leh veng a tlawhnaah hian Law Minister chuan, “Khaw-tlang mamawh leh har-satna zawng zawng vawi leh khatah a chinfel mai theih loh avangin a pawimawh dan ang zelin a tahtawla hmalak thin aniang. Mipuite chu ram neitu thinlung pu a thing leh mau humhalh kawnga tanla tur kan ni. Kut tlingloa sum lakluh leh hlemhletna laka fihlim tura kan ni a, rilru puthmang dik siam hmasak phawt chuan hmasawnna dangte dik takin a kalpui theih a ni,” a ti a.

“Mamawhtute tana awlsam taka dawr theiha thuneitute an inchhawp hnai hi ram inkaihhruaina leh inrelbawlna kawnga bung thar a ni. Hmasawnna dik leh tluantling nei turin moral development neih hmasak a ngai a, thinlung thianghlim, dikna, rinawmna leh taihmakna a khat mizia kan neih hmasak a tul a ni,” a ti bawk. Minister hian khawtlang mipuite chu khawtlang leh ram tana rotling tur siam kawnga tawiawm tlat turin a sawm a ni.

Khawtlang mipui ten mamawh leh harsatna an neih te Minister leh Official te hnenah thlenin, Sawrkar Department hotuten an harsatna sutkian dan turte leh theih anih leh nih lohte an sawifiah.