August 14, 2023; Tunhnai ruahsur vanga Lawngtlai Electric Veng leitlahniam chu nizan hmasa lam khan tlem a chet belh a, harsatna liantham erawh a thlenbelh rihlo.

Leichetna intanna lam National Highway 54, Lawngtlai-III huamchhung ah leiche hian ke a kalna lai a tihkhik bakah kawng chhuat pawh a khitel a, a chaklam Electric veng chhung ah pawh lei hi tlem a chetbelh tih khawtlang hruaitute chuan an sawi.

Electric Veng leitlahniam vang hian chhungkua 23 a mihring 103 chu hmunhim lam ah sawn niin, leitlahniamin a nghawng In pali thiahtur a ruahman zingah pahnih chu vantlang hnatlanga thawhtheih chin chu thiah zawh thawhkhat a ni tawh.

Lawngtlai-III leitlahniam ti a hriatlar hi kum 1995 May 17 atanga intan niin, kum 28 chhung chu harsatna eng eng emaw helai leitlahniam in a nghawng ten an tuar tawh a, sawrkar pawn a theih ang angin hmalakna a kalpui reng a, tunhnai kumah a chetbelh loh hnu ah kumin ruahsur ah lei hi a che leh ta a ni.