Aizawl: Social Welfare Department (SWD) bul tumin Zirtawpni khan Lawngtlai Chawnhu veng-ah Pradhan Mantri Matru Vandana Yojana (PMMVY) IEC Campaign Rally leh Poshan Pakhwada Rally buatsaih a ni.
Rally-ah hian Lawngtlai District Programme Officer (ICDS)/Nodal Officer (PMMVY) Vanlalhruaii leh Lawngtlai Child Development Project Officer (CDPO) Hlawnchii te hovin SWD-a thawkte leh Chawnhu khawtlang mipuiten hun an hmang ho a ni. PMMVY hnuaiah hian kum 2017 hnu lama nau pai leh nau pawmte hnenah nu leh naute inenkawl nan tanpuina pawisa fai Rs. 5,000/- pek theih a ni a. PMMVY hnuaia hamthatna dawng tur hian mahni awmna veng anganwadi centre hnai berah nau pai atanga ni 150 ral hmain inziah luh ngei ngei tur a ni a. He tanpuina hi sawrkar atang leh hmun dang atanga naupai tanpuina dang dawng theite tan erawh dil theih a ni lo.
Kum 2018 atanga 2019 March thla thlengin Lawngtlai District bikah mi 2682-in PMMVY hnuaiah hian tanpuina an dawng tawh a, tanpuina pek chhuah tawh zat hi Rs. 26,82,000/- niin, tanpuina hi a diltu account-ah direct benefit trarsfer hmanga thun thin a ni.
Poshan Abhiyaan hi multi-ministerial convergence mission niin, a thil tum ber chu kum 2022-ah India ram hi taksa mamawh ei tur tha tlakchham awm lohna ram (malnutrition free country) a nih theih nana anganwadi centre kaltlanga hma lak a ni a. Lawngtlai District-ah pawh hma lak chhoh mek a ni.
&&&&&&