May 25, 2022; Central Young Lai Association (CYLA) huaihawtin, tukin zing dar 7 atang khan Mizoram sawrkar in District Hospital Lawngtlai a doctor pali a sawnchhuahna order sut tur leh doctor dang dah belh tura an ngenna tihhlawhtlin a nih theih nan, Lawngtlai khawpui chhung leh Bungtlang 'S' ah sawrkar office, zirna In leh bank te khar a ni a, dawr leh bazar hmun te leh mipui nunphung erawh a pangngai angin a kal thung.      

CYLA Gen. secy Joseph Lalhmingthanga hnen atanga ZALEN thudawn danin, tukin zing dar 7 atang khan Lawngtlai leh Bungtlang 'S' a YLA branch te chu an huam chhung theuh ah duty in an chhuak a, he thu ziahlai chawhma lam thleng khan tumah dan buai ngai an awm lo a, an hmalakna mipuiin an thlawp tha a, tuna an hmalakna anga mipui thlawp an hlawhna leh an tanrualna ang hi a la awm ngai lo ni hial a an hriat thu CYLA GS chuan a sawi.

Tukin atanga picketting an kalpui hi sawrkar atanga thu lawmawm an dawn hma chuan tiamchin awm lo in an kalpui dawn tih CYLA GS chuan sawiin, an ngenna ngai pawimawhin Doctor sawnchhuah takte pawhin Lawngtlai an la chhuahsan loh thu a sawi a, an hmalak mekna in awmzia a neilo a nih chuan nasa zawk a hmalak chhunzawm an tum thu a sawi.

Nimin, May 24 a Lawngtlai press club a thuthar thehdarhtute an kawmna ah Central YLA president HC Vanlalruatpuia chuan, District Hospital, Lawngtlai ah doctor indaih lohna a nasat vangin Chief Minister hnen ah ziak leh tawngka a doctor pali, Gynaecologist, Pediatrician, General Surgeon leh Eye Specialist te dah belh tur a an lo ngen tawh thu sawiin, "Dah belh lova, a awmsa pali sawn chhuak a, midang pathum dahluh an ni chu hriatthiam theih a nilo," a ti a.

Nunphung pangngaiah pawh district hnufual, mipui tamna leh naupiang hlim thi tamna ber Lawngtlai district hi sawrkarin ngaihthah tawh loh tur leh Myanmar ram buai vanga raltlan mi singkhat vel Lawngtlai district in a kawllai, doctor mamawhna a san zual lai a doctor pali sawnchhuah an ni leh midang pathum dahluh an ni chu Lawngtlai district mipuite zahlohna ah Central YLA chuan a ngai tih a sawi.