ZALEN July 23, 2026 : Mizoram State Election Commission chuan AMC leh LMC hnuaia Local Council 9 leh District pathuma Village Council 3 a seat ruak hnawh khat turin thla thar August ni 20 ah by-election neih a nih tur thu a sawi.

State Election Commission in inthlan that a puanna hmun te hi Aizawl Municipal Corporation huam chhunga Local Council pariat - Selesih, Durtlang, Zotlang, Luangmual, Dawrpui Vengthar, Bungkawn, Republic leh Salem Veng te an ni a. Heng zingah hian ruat bik seat Republic leh Luangmual ah te awmin a bak zawng vengah hian a nawlpuiin an chuh theih seat khat theuh a ruak a ni.

District pathum huam chhunga Village Council pathum te hi Lunglei District a Bunghmun, Serchhip District a East Lungdar leh Kolasib District a Bilkhawthlir South te an ni a. Heng zingah hian ruat bik seat Bunghmunah awmin, East Lungdar leh Bilkhawthlir South ah hian a nawlpuiin an chuh theih seat khat ve ve a ruak a ni.

Lunglei Municipal Corporation huam chhunga Local Council pakhat Zotlang ah pawh a nawlpuin an chuh theih seat ruak pakhat a awm bawk a ni. 

Heng by-election neihna tur Local Council leh Village Council-ah te hian Model Code of Conduct hman tan nghal a ni.

He inthlana chuh tum te tan thla thar August ni 3 thleng khian nomination file theih a ni ang a, thla thar ni 20 vekah vote thlak a ni ang a, vote thlak hun khar a nih hnuah vote tlate chhiar nghal a ni dawn bawk a ni.