Aizawl: Mizoram State Legal Services Authority chuan a thlawna Ukil rawih nan Rs. 3,23,71,478 a hmang tawh.

MSLSA thawktute chuan Zalen zawhna chhangin kum 2012-13 leh 2018-19 inkar chhung-in mi 11,392 tan a thlawnin ukil rawih a ni a, hengte hi Aizawl district legal services authority hnuaiah 5026, Champhai DLSA-ah 834, Kolasib DLSA-ah 945, Lawngtlai DLSA-ah 421, Lunglei DLSA-ah 2911, Mamit DLSA-ah 506, Serchhip DLSA-ah 163 leh Siaha DLSA-ah 586 te a ni tih an sawi.

Mizoram State Legal Services Authority a Member Secretary Vanlalenmawia chuan sawrkarin mi rethei Ukil ruai turte chu kum khata Rs. 25,000 lalut chin te an ni tur tia ruahmanna a lo siam tawh chu Rs. nuai khatah tihsan tumin hmalak mek a ni tih Zalen a hrilh a. Mizoramah erawh chuan a mi chengte Tribal kan nih avangin a mamawhte tan chuan a thlawnin Ukil a rawih theih tih sawiin a thlawna Ukil rawih thinah Ukil junior leh tha vak lo te an pe thin nia sawi awm chu thu dik lo a ni tiin, “Ukil tha lo kan pe lo a, an hlawh pawh an senior dan a zirin pek dan a awm vek a. Kan Ukil rawih te hi an tha anih a rinawm a, mipui pawh hian an bawh nasa hle a ni,” a ti.

Member Secretary chuan mi rethei Ukil rawihsak bakah hian mipuite awlsam zawkna ngaihtuahin Court-a kal kher lova thubuai neite inremna tur Lok Adalat chu National Legal Services Authority hnuaiah din a ni tih sawiin hei hi thla khatah vawi hnih aia tlem lo thukhawm tura tih an ni a, mipuiten an awlsam phah hle tih sawiin a chang chuan Mobile Lok Adalat neiin thubuai neihna khua ah te an kalchilh zawk thin niin amah kawmtu Zalen palai a hrilh bawk.

Pro bono legal service scheme 2019

State Legal Services Authority, Zirtawpnia thukhawm chuan ukil te’n mi harsa puih an duha a thlawna an dinsak theihna tur Pro Bono Legal Services 2019 chu hman theih tura chhawp chhuah tha an ti a.

He scheme hi SLSA in a thlawna ukil rawih theihna a kalpui mek nen a inang loa, tuna hman mekah chuan ukil te chuan an ‘client’ te atangin pawisa la lo mah se SLSA atangin an din man a pe thung a. Pro Bono ah chuan ukil te’n an duhthlanna liau liauin civil/criminal case ah client retheih vanga an puih duhin a thlawnin an dinsak thei ang a, SLSA pawhin an din man a pe lo ang. Pro Bono a service pe duh ukil te chu SLSA ah empanelment an dil tur a ni ang a, kum 5 tawnhriat lo nei tawh chin a huam ang.

Pro Bono scheme hi hman ni mah se SLSA-in ukil rawihsak scheme hi a kal reng tho ang.