Mizo Writers’ Association (MWA)-in a vawi thum nana an buatsaih, Vana Pa Hall-a Lehkhabu Pho Rûnpui chu hlawhtling takin zawh fel a ni a. Thalai, kum 30 hnuai lamin an hlut a, nikum aiin an hralh hnem zawk bawk.

Thawhtanni atanga tan, Lehkhabu Pho Rûnpui hi MWA-in a buatsaih vawi thumna a ni a, Inrinni chawhnu khan khar a ni a. Organizing Secretary K.Remruatfela chuan a hlawhtling hle tih a sawi.

ZALEN-in a biaknaah an thil huaihawt chu thalaiin an hlut tih a sawi a, “Min tlawhtu zingah kum 30 hnuai lam an tam ber,” a ti a. “Thalai zingah lehkhabu ngaina an la tam hle a, duh ang tawk lei thei si lo, thlek ngawih ngawih hmuh tur pawh an tam hle,” a ti.

Kumin Lehkhabu Pho Rûnpuiah hian ni ruk chhungin Rs. 10,22,178 man an hralh a. Lehkhabu malah Dr. C.Lalhrekima lehkhabu, ‘I thu ber lo’ chu hralh hnem ber a ni.

He hunah hian MWA member 115-te lehkhabu pho chhuah a ni a, lehkhabu chi hrang 1,200 vel zet niin mi malah Lalhmachhuana Zofa lehkhabu ziah pho chhuah hnem ber a ni.

Thawhtannia a hawnna neihah lehkhabu 17 zet a hlawma tlangzarh a ni bawk.

Lehkhabu Pho Rûnpui hi ziak mite chawi sanna atan liau liauva MWA-in a huaihawt thin niin a hralhna pawh lehkhabu neitute kutah zel a lut a ni.

MWA hian Aizawla vawi hnih buatsaih tawh bakah December, 2019 khan Tahan Literary Club-in an sawm angin Tahan-ah book fest an huaihawt tawh bawk.

Organising secretary chuan an inruahman ang chuan kum tin huaihawt zel an tum tih ZALEN a hrilh.