Aizawl August 14, 2024 : Mizoram sawrkar chuan Mizoram Ground Water (Control & Regulation) Act, 2023 leh Rule 2024 a tihchhuah chu hman tan a ni dawn. he dan hnuaia hian Mizoram State Ground Water Authority pawh din a ni tawh a, hei hian state puma lei chhung tui humhalh leh hman dan tur a kalpui dawn a ni.

Vawiina PHE Minister Prof Lalnilawma'n Chanchinthar thehdarhtute a kawm naah Dan thar chungchang hi sawiin, he dan thar hnuaiah hi chuan Lei chhung tui la chhuaka hman tum te chuan mahni hman tur, sumdawnna, lo neihna leh industry atana hman tur pawh ni se Mizoram State Ground water Authority (MSGA) hnenah form awmsa hmangin dilna an thleh lut tur a ni a, phalna pekte chauhin lei verhin lei chhung tui an hmang thei ang.

Lei chhunga tui la chhuaka hmang meh leh leiverhna khawl (drilling rig leh a dang) nei chuan MSGA-ah dilna form awmsa thehlutin an inziak lut vek tur a ni.

Lei chhu tui tam tawk lohna hmun atanga tui lak chhuah khapna dan siam a ni a. Dan hian tui humhalh a ngai pawimawh a, ruahtui khawl leh lo neihna atana tui hman dan tha zawk neih te a ngaipawimawh a ni.

He dan bawhchhia a, phalna nei loa hma la lui emaw, khawl register loh hmanga leiverhte chu hrem a ni ang. MSGA chuan lei chhung tui awmte humhalh a, tangkai taka hman tlan theihna tur dan siam hi zawm vek turin mipuite an ngen.