ZALEN August 31, 2023 : Irrigation Minister C. Lalrinsanga chuan tunhma zawngin lei hnuaia tui awm (Ground Water) hman tangkai tuma hmalakna la awm ngai lo, a ti a. Lui tui kang zel karah lei hnuaia tui awm an zawnna atanga an hmuh danin ground water dinhmun hi a la tha hrih niin a sawi. PMKSY-HKKP, NABARD leh PM-KUSUM hnuaiah ground water irrigation project nasa taka kalpui a nih thu a sawi bawk.

Minister chuan thlai chawmna atana ground water hmang tangkai tur hian hma an la chho tih sawiin, "Mizorama a vawi khat nan PMKSY-HKKP hnuaiah ground water irrigation scheme hi kum 2021-22 atanga thawh tan niin project 13 kalpui a ni. Sum ruahman zat chu cheng nuai 1604.89 a ni. He project hnuaiah hian Tubewell 209 verh niin ram hectare 553 ah chhungkua 468 in an chhawr dawn a ni. Ground gater irrigation project hi NABARD-RIDF-XXVI hnuaiah kum 2021 khan Chawmzau, Serchhip-ah kalpui a ni bawk a, cheng nuai 227.15 ruahman niin Tubewell 31 verh niin, ram hectare 52 chawm tura ruahman a ni a, tunah hian Solar pump installation kalpui mek a ni," a ti.

C. Lalrinsanga chuan, "Ministry of New & Renewable Energy (MNRE) hnuaiah PM-KUSUM component-B ah loneitute tan Solar panel leh pump, subsidy a pek turin ruahmanna kalpui mek a ni a. Unit 200 min rawn sanction tawh a. Hemi atan hian SMS(State Matching share) hi 30% a nih laiin kan CM zahawm takin Loneitute a ngaih pawimawh em avangin Matching share hi min pe tawh a ni," a ti bawk.

Project thawh hmabak pawh an la nei tih sawiin, "PM-KUSUM hnuaiah vek hian kan sawi tak Unit 200 bakah hian Unit 1500 dang sanction kan hmu leh a. SMS atan hian NABARD-RIDF XXIX hnuaiah cheng nuai 900 kan nei tawh bawk a. Tunah hian Central sawrkarin kan state tan bik supplier a zawng mek a, MNRE chuan tender chhuahin supplier thlan fel hun kan nghak mek a ni," a ti.