July 24, 2023; Tun thla ni 7-a Keitum khuaa hmeichhe naupang kum 8 mi Lalpeksangi d/o Lalrinsangi boral chungchangah NH. 54 laihzauh leh siamthat hna thawk mektu Company chuan zangnadawmna atan cheng nuai 4 an pe a, he sum hi Lalpeksangi nu hnenah hian hlan fel a ni tawh.

Lenkawlin a tarlan danin, vanduaina tawk Lalpeksangi chhungte hi Serchhip District Bawrhsap Nazuk Kumar IAS pawhin vanduaina an tawh hnu hian tlawhin kawng siam hna thawktute hi Lalpeksangi Thlan siamna tur tum sak turin a ti a, hemi ang hian Thlan Lung leh a siamna tur hmanrua (Cement, Balu, adt) bakah buhfai bag khat leh Ar kg. 50 tum turin an intiam nia thudawn a ni bawk.

Tarlan tawh angin tun thla ni 7 khan Lalpeksangi (8) hi chin hriatloh in a awm a, an In bul lawka tui tling bulah a a kawr leh Chapal hmuh a nih avangin tui ah hian a tla nia rin a ni a, khawl hmanga Tui hi pump chhuah a nih hnuah tuithiam te lutin he tuikhuah ah hian a ruang hi hmuh a ni a.

He tui tling hi NH. 54 laihzauh leh siamthat hna thawktute hian Culvert awmna tur nia an sawi niin an laih hnuah tui tling hi a tamin vanduaina hi a thlen phah ah ngaih a ni.