ZALEN May 8, 2026: Mizoram Food & Allied Industries Corporation Limited (MIFCO) chuan nimin khan Chhingchhip-a an plant-ah Ready To Serve (RTS) beverages Lakhuihthei leh Sapthei tui an tlangzarh a. Heng in mai theih theitui chi hnih hi Government of Mizoram Secretary Ramchuana, Finance Department-in a tlangzarh a ni.

"Hetiang tlangzarh theia an thawhrimna hi a hlutna chu an inpekna te a ni a, a ropui ka ti a ni. 13th Finance Commission-ah khan sum a harsa a, PSU zingah MIFCO pawh hi private kuta hlan rel a ni a. Sawrkar tharin hmakna te chhawpin mumal deuha kalin product pahnih tlangzarh theiin kan awm leh ta a ni," tiin Ramchuana, Secretary, Finance Dept. chuan a sawi.

Hetianga hmala tak tak te tanpui an inhuam thu Ramchuana chuan sawiin, "Hmalâk tum tak tak te tanpuina han inpêk hi chu kan inhuam em em a ni," tiin MIFCO laka an inhuam thui thu a sawi bawk.

MIFCO lo thang chho zel hi thlâwp tlat ila tiin khuallian chuan a sawi a, MIFCO leh ZOHANDCO chu mahni siamchhuah atanga ding chhuak thei an nih thu a sawi a. "Mahni tharchhuah nei tur in ni a, in tanlakna te a takin kan hmua a lawmawm ka ti. Tunhma aia hmasawn turin duhsakna ka hlan a che u," a ti.

Thusawi tura sawm C. Lalnunnema, Vice President ZPM Gen. Hqrs. chuan, "Audit lama awm thin ka nih avangin Corporation kha tihtawp vek kan duh thin a. Amaherawhchu, sawrkar thara kalphung tharah kan ram ti thang lian tura hmasawnna ropui tak ka hmu a, hmasawn zawnga kan kal ta hi a lawmawm," a ti. Sawrkar tanpuitu nih a pawimawh thu a sawi bawk.

MIFCO Chairman Lalthazuala Rawite chuan an siamchhuah te a hriselin a thianghlim thu a sawi a, sawrkar laka an leiba an rulh zawh mai bâkah kum 2024-25 chhungin cheng nuai 14 an hlêp thu a sawi. Kumin 2025-2026 chu an la chhut zo hman rih lo a ni.

"Kan siam hi ei tlak, ei atana hrisel leh changkang a ni a. FSSAI certified a ni, Baibing, Rawtuai leh Mautuai tin siam chhuah thuai kan tuma kan enchhin mêk bawk," tiin MIFCO Chairman chuan a sawi a. Leiba cheng vaibelchhe 1.35 awm sa an chhawm chu an rul zo tawh a, an hlêp mêk tawh a ni.

MIFCO hian hmun thumah hmun lian tak tak an nei a, Sairanga an hmun chu Rel a lo thlen tâk avangin 'Warehouse Complex' atan siam an tum tih an sawi a. Bungbangla hmuna ran talhna chu 'outsource' tawhin Zo Meat kutah dahin, anni hian vawksa thianghlim an zuar a, electric bill an tum bakah fee an chhunglut bawk. MIFCO Chhingchhipah hian processing unit pahnih an buatsaih leh dawn niin Pu H. Lalrochâma, General Manager chuan a sawi a. Buhfai an supply bakah Petrol Pump siam turin hma an la mek bawk.

Sapthei leh Lakhuihthei tui in nghal theih hi ₹ 10 man zêla zawrh chhuah tur a ni. Sapthei hi Kg 1 cheng 45-in an la a ni. Chhingchhipah hian Ropuiliani Women Farmer Producer Company Limited a awm bawk a, anni hian hmarcha an sawngbawla hmarcha ro thahnem tak an hralh chhuak thin a ni.