Aizawl : Sawrkar laipuia Ministry of Road Transaport & Highways (North-East Zone) chuan Mizoram PWD te lo dil tawh angin, Central Road Infrastructure Fund (CRIF) hmangin Durtlang to Sihphir inkar kawng zauh hnathawh vawiin khan a rawn phalsak a, kum 2021-2022 chhunga thawhtan tur a nih thu a tarlang bawk.

Ministry of Road Transport & Highways (North-East Zone) chuan phalna hi Additional Chief Secretary, Government of Mizoram, Public Works Department, Mizoram, Aizawl hnenah lehkha hmangin a rawn hriattir a, he kawng zauh leh siamthat hna thawh tur hi Km 10.25 a thui niin Cheng vaibelchhe 46.57 hmanga thawh tur a ni. Central Road Infrastructure Fund (CRIF) hmanga thawh tur a ni. 

Mizoram PWD chuan Central sawrkar hnenah hian 1.3.2022 khan he kawng zauh leh siamthat hna thawhna hi a lo zuk dil tawh a, he dilna hi Addition Chief Secretary, Government of Mizoram hminga thawh niin, hmun thuma hnathawhna tur Cheng Vaibelchhe 218.21 an dil a, tuna mi hi CRIF sum hmanga thawh turin an rawn phalsak ta a ni.

Vawiina Road Transport and Highways Minister Nitin Gadkari a hmuh tumin MP (Lok Sabha) C. Lalrosanga chuan Durtlang Leitan-Sihphir kawng tihzauh leh siamthatna tur project pawmpuina Ministry of Road Transport and Highways-in vawiina a pechhuak ta chu lawmawm a tih thu a hrilh a ni.