Aizawl February 17, 2024 : Vawk natna chi khat African Swine Fever vangin tunhnai khan Champhai district chhunga Leithum khuaah vawk 15 an thi.

ZALEN in AH&Vety department thawktute hnen atanga thu a dawn danin ASF hi Mizoramah a awm (chenchilh) reng tawh avangin a khat tawkin vawk thi hi chu an awm leh zeuh thin a. Mahse a ruala kai leh thi erawh tunhnaiah hriat a ni lem lo a, hetih lai hian tunhnai khan Leithum khuaah ASF vang hian vawk 15 an thi tawh a, ASF vei nia hriat vawk 3 suat an ni tawh tih an sawi a. Leithum bak khaw thenawmah chuan hri hi a la darh lo nia an hriat thu an sawi bawk.

AH&Vety department chhinchhiah danin African Swine Fever hi kum 2021 khan Mizoramah hmuh tan a niin hrileng thawhkhatna ah hian vawk 33,417 an thi a, ASF hrikai nia hriat vawk 12,568 suat an ni. Hrileng thawh hnihna kum 2022 khan ASF vang hian vawk 12,391 thi lehin vawk 11,594 suat a ni a. Hrileng thawh thumna nikumah khan vawk 980 thiin 590 suat leh an ni. ASF hrileng thawh khatna hian khaw 272, thawh hnihna in khaw 149 leh thawh thumna in khaw 29 te a nghawng a. Vawk hri hian kuminah engtin nge Mizoram hi a nghawng dawn hriat a la ni lo.