Tlai khaw hnuah ka’n iak ve teh ang. Tun hnaia kan ram hotu lû ber kan beih… han tih lêmah, amah chungchang ziahna tam ta lutuk hian nuih a tiza dawn dawn ta mai si a!

Kumin Chapchar Kut lârpui bertu nia langa chu Vanapa Halla Art Exhibition neih a nih tuma kan Chief Minister, Pu Zoramthanga thlalâk chungchang kha a ni âwm e.

Kha lemziak ka hmuh tirh phat khan, kan sorkar kal lai, hmasawnna rêl lai kaiza vêngtu tur bera ngaih, sorkar fawng vuantu party lam worker ten an han ngai-haw ta lutuk mai khan ka nuih hi a tiza tlat a. Mahse, thupui bera laa Press Release te chhuaha Congress lam thalaite nen an han inbak-kaih tak hnu leh, kha lemziak hmu pha hauh lo tur mi tam takin kan lo hmuh tâk hnu hian, ka’n ngaihtuah chiang a—ka thin a ti ur letling ta tlat thung!

Ram rawngbawl tura kan thlan tlin sorkarna siamtute leh an kaiza vengtu ber tur party worker ten, ram hnuk khawih pha thil nei reng reng lo, khati khawpa vuivaipui a, a thlavâng an han hauh ta mai kha, a buaipui tur hriat lohthlak mang tak e aw… ka lo ti ve a. Mi lemziak lo haw tawk velin ram an hmangaihah ka ngai mai!

An sawi an SEP leh Mau/rua lama an pu thusawi nuihzatthlâk tak tak, mi’n fiamthu thawh nan taka an hman tâk luai luai ngawihbopui daih si, Smart city emaw, Traffic jam free city emaw, kawng chhâwng emaw, nuai thum sem chungchang emawa a thusawi, video record la awm vek chungchanga a thlavang hauh a hnêka, a thlalak, zawrh tura an pholan lo buaipui chiam a, exhibition atanga lo laksawn vêl emaw leh thuthar thehdarhtute hmaa thuchhuah han siam leh vel khan, an thil buaipui nêpzia leh ram hnuk a khawih phak lohzia a tilang chiang a—party worker hna thawh âwm tâwk vêl nêpzia a pholang chiang hle zâwk a nih kha! Chung mite chuan kan rama rorel lai party kaiza hi an vêng chu a ni si a le!

Assembly Budget Session-a kan hotupa thusawi dang pakhat, rorelna khawl fawng a vawn hma atang daih tawha a lo âtchilh ber tawh, Mau/Rua chungchanga a thusawi kha han tuihnih ka duh ve tlat bawk: ‘Delhi pawh kan zirtir, keini pawhin kan zir chawp, a hmuchhuaktupa pawhin a zir chawp ve tho. Chu chu kan buaina ber a ni… Tuna kan Scientist neihten Protocol an hriat awmchhun chu Lactiferous leh Brandisii kha tihtlak chin a chuan a ni. A aia lian pawh a awm… mahse, a protocol-a kha an la hmuchhuak rih tlat lo,’ tia a sawi khan nuih pawh a tiza lo—thin a tirim zâwk hial!

Tin, kan MLA rual thu thuptena ‘Kan Scientist’ a tihte chu tute nge an nih tih te, a protocol (proforman ni si lo!)-te chu eng chiah nge a nih tih zawt ngam lo leh zawhna chang pawh hre loa an han uipui tuilian thlir mai thei kha thilmak a ni a; thil lungchhiatthlak tak pawh a ni.

Vanglaini 12, 2020 chhuaka Nanema inti thuziak, ‘Assembly House-a dawt sawina tam lutuk hi!’ tihah khan, kum 2015-a 10th World Bamboo Congress, Korea rama nghah a nih daih tawh thu leh ML Sharma leh C Nirmala te pahnih, Department of Biology, Punjab University-a zirtirtute paper zirho a nih daih tawh thu a ziak a. Tin, “Ministry of Agriculture hnuaia India sorkar pawhin kum 2006 daih tawhah khan ‘National Bamboo Mission’ a lo kalpui tawh laia India ram lo zuk zirtir thu hi a awm lo reng reng,” tiin a tuihnih bawk.

Chu bâka thil mak lehzel chu: a buaipui ber tur Horticulture Department (kan CM Department chan lehnghal) lam emaw eng department dang mahin zirchianna fumfe sawi tur an la nei lo lehzel hi a ni. Chief Minister tawngvai niâwm tak ngaithla liam thup ‘peih’ leh a thusawi ang ang pawma passed leh ringawt mai thin kan oppostition member te pawh hi, an ‘taimâk’ dan a mak zâwk ngawt mai!

Nikum Assembly Session-a mau tiak lo thleng mai tur, ‘a hmui’ hmang vêk a, “… a tiak kha sing 4/5 vel phun hman kan inbeisei … example tal tih hman kan tum,” zu han ti leh ngam sak sak a!

Zirchianna fumfe an nei lo, tumah rêngin an nei lo a ni chêk ang chu—an ngawih zum zût ni!

Tin, a tâwp nan, heng kan sawi tâk, sawi chhuaktu te thusawi leh an tawngkamte hi: ‘Ramri chungchang chinfel dan tur thurûk kan hria; MAHSE, KAN SAWI DAWN LO,’ tiâwm tâwk vêl thiltih a ang mang e. An mahni thlang tlingtu mipui lam hi chu, A DER TAL PAWN MIN ZAH ve tawh rawh se!

by Zirsangkima