Aizawl: Tunlai China rama hrileng Coronavirus darh zel tur venna chi khat atan Mizoram sawrkar chuan nimin atang khan Lengpui tumhmunah he natna vei nia rinhlelhte enfiah hna a thawk tan.

Zalen palaiin Dr. Pachuau Lalmalsawma, Epidemiologist & State Nodal Officer, Integrated Disease Surveillance Programme hnen atanga thu a dawn danin sawrkar laipui duh dan angin January ni 15, 2020 hnu lama China atanga lo hawte chu enfiah vek an tum tih a sawi a. He natna vei nia rinhlelhte chu an sample la in NICED, Kolkata-ah enfiah turin an thawn dawn niin a sawi. Lengpui bakah hian Zokhawthar lamah pawh enfiah turin ruahmanna an siam mek niin a sawi bawk.

Dr. Pachuau Lalmalsawma chuan he natna vei hmuh chhuahte enkawlna turin State Referral Hospital, Falkawn ah khum 30 awm theihna tur ward pawh an buatsaih tih sawiin hei bakah hian Lengpui CHC pawh a tul huna hman theih turin hman tangkai an tum niin a sawi.