Aizawl; Airport him leh him loh endikna ah Lengpui Airport chuan Civil Aviation Regulations (CARs) duh dan nasa takin a phak lo a, hemi vang hian Mizoram sawrkar hmalakna in, Ministry of finance leh DoNER ministry atanga sum hmuh cheng vbc. 50 hmangin thawm that hna thawh mek a ni. 

Mizoram sawrkar a Aviation wing hotute hnen atanga ZALEN thudawn danin, Airport himna chungchanga thuneitu sang ber Director General of Civil Aviation (DGCA) leh Airport Licencing Authority in nikum 2020 kum tir a Airport him leh him loh a endikna atangin Lengpui Airport chuan CARs duh dan a pha lo a, a phak loh na te chu runway that tawk loh vang te, thawktu awm mumal loh vangte, infrastructure dang hlui tawh leh that tawk tawh loh vang te a ni.

CARs duh dan a phak loh na te chu siam that a nih loh chuan licence cancel ah a rawn vau tih thudawnna chuan sawiin, sorkar in mipui tawrhna awm thei turte pum pelh a nih theihna turin theihtawp a chhuah niin a sawi.

Thudawnna in a sawi danin, CM Zoramthanga hmalakna avangin Lengpui Airport licence chu thla 3 a tan extent a ni mek a, chu chu tun April ni 13, 2021 hian a tawp ang. Hmalak a nih dan a zirin licence renew a ni leh chauh dawn a, chumi vang chuan Airport chei that lamah sorkar a tang hle.

ZALEN thudawn danin, Lengpui Airport thawm thatna turin Ministry of finance atangin cheng vbc. 30.41 hmuh a ni a, DoNER ministry atangin cheng vbc. 19.59 hmuh ni bawkin, Mizoram sorkarin SEDP atanga sum a dah te nen tunah hian Airport thawm that hna thawh mek a ni.