Aizawl January 10, 2024: Vawiin khan Chief Minister hovin CM Conference Hall-ah Lengpui Airport enkawltu dang hnena hlan chungchang sawiin an thukhawm a. Mizoram tana tha ber tur zawnga enkawltu tur thlan a nih theih nana lo bawh zuitu tur Working Group din ni se, an ti.

Meeting-ah hian India ram hmun danga Airport engemawzat, Airport Authority of India kuta awm mek an enkawl zui dan te leh private company ten (PPP Mode-a) an kuta awm an enkawl dan tlangpui tarlan a ni. Airport Authority of India hnenah nge private company te hnena hlan tha zawk dawn a, Mizoram tana hlawk ber tur enge ni ang tih khaikhinna chipchiar lo neitu tur Working Committee (working group) din ni se, annin a rang lama lo umzuiin, report kimchang an neih hunah thutkhawm leh ni se, an ti a ni.

Lengpui Airport ram venhim dan tur te, Airport hnathawktu pawimawh tuna dah belh nghal ngai nia lang te pawh meeting-ah hian sawi rik a ni.

Meeting ah hian Adviser to CM TBC Lalvenchhunga, Pu Resource Mobilisation Committee Vice Chairman Haukhuma Hauzel, IAS leh Chief Secretary Dr. Renu Sharma, IAS, te an tel a ni.