Aizawl: Lengpui thlawhna tum hmun ‘runway’ chu a chak tawk loh avangin thlawhna lian te an tum ngam lo.
Zalen palai zawhna chhangin Principal Consultant, Aviation Wg. Cdr. J.Lalhmingliana chuan, “Tuna Lengpui runway chak/khauh zawng hi 36 pcn a ni a, hei hi thlawhna lian full load tan chuan a him tawk lo a, Mizoram PWD ten siamthat hna an thawk mek a ni,” a ti. J.Lalhmingliana chuan airbus te chu passenger leh bungrua nen ton 62 vela rit nia ngaih a ni tih sawiin hei hi tun Lengpui airport runway chuan a dawl lo a ngaih a ni tiin thlawhna dang te pawh full load in an tum ngam lo a, company te chu an hlawk tur angin an hlawk phak dawn lo niin a sawi bawk.
Aizawl-Guwahati thlawhna service chungchangah Wg. Cdr. J.Lalhmingliana chuan theihtawpin thlawhna service a awm leh theihnan tan an la reng tih sawiin Indigo nen pawh inbia in company lam hotute pawh hmunhma enin an lo kal tawh tih a sawi a, tun dinhmunah chuan engtik hunah nge service hi chhunzawm leh theih a nih dawn a la hriatloh tih a sawi a.
Tuna Aizawl-Kolkata a thlawk mek Air India chu tam zawk thlawk (additional flight) turin an ngen tih sawiin vawiina Chief Minister Delhi zin turin Air India chairman & managing director Ashwani Lohan pawh hmuin sawipui a tum niin Zalen a hrilh bawk.