Aizawl: Chief Minister Zoramthanga chuan Lengpui airport chu a chak tawk leh chak tawk loh AAI mi thiamten an teh tha dawn niin a sawi.

Assembly session neih zawh taka a chanpual department hnathawh a sawifiahnaah Chief Minister chuan, “Lengpui airport hi kum 20 kalta vela siam a niin a tira a runway chak zawng ‘pavement classification number’ chu 36 a ni a, thlawhna liante hi 50-ah lo chuan an tum duh loh avangin Mizorama rawn service airline-ten full load-in thil an phur thei lo va, hei vang hian a chuan man pawh hmun dang aiin an tito a ni,” a ti.

Chief Minister chuan Lengpui tumhmun (runway) chu vaibelchhe 5/6 sengin siam that a ni tiin lung pawh Silchar lam atangin a tha chi lakluh a ni tih a sawi a. A tehtu AAI lamte an lokal mek tih sawiin tuna an siam mek chu a that tawk an rin thu sawiin Indigo emaw, Air Asia emaw koh luh theih an beisei tih a sawi bawk.

Chief Minister chuan Doppler Very High Frequency Omni Range (DVOR) pawh Hmunpui tlangah hun an tum tih sawiin hei hi peih a nih hun chuan km 100 atanga pawhin Lengpui airport chu chiang takin a hriat theih dawn niin a sawi bawk.