Aizawl January 20, 2024 : Zirtawpni khan Labour, Employment, Skill Development & Entrepreneurship changtu Minister Lalnghinglova Hmar leh Ministry of Skill Development & Entrepreneurship Secretary Atul Kumar Tiwari te chuan inkawmna hun tha tak neiin Mizorama skill development leh entrepreneurship lama hmasawnna awm thei te an sawi dun a ni.

Lalnghinglova Hmar chuan Mizorama hemi kawnga hmalakna kalpui mek hrang hrangte chu Secretary hrilhin hma lakna theihna tur kawng awm thei nia a hriat chungchangte a sawipui a. Secretary chuan Mizoramin tih theih, a la tih loh thenkhatte sawilangin Sawrkar Laipui chuan skill development leh entrepreneurship te chu a ngaihpawimawh em avangin, kawng hrang hranga Mizoram tan hma lakna tur tam tak a awm thu a sawi. Mizoram mila ruahmanna an siam chuan puih a inhuam thute Minister hi a hrilh.

Minister hian Secretary hi Mizoram rawn zin a, hmun ngeia hmalakna awm thei te leh hmasawnna awm thei te sawiho turin a sawm a, Secretary chuan sawmna hi pawmin a hun nei hmasak berah Mizoram zin a tum thu a sawi a ni.