Libya-a ruah tam tak a sur hnua tuikhuah pahnih luang liamin tui lian rapthlak tak a tawrh avanga thi chu mi 11,300 an tling tawh a, mi zawn hna la thawh mek zel a ni bawk tih Libyan Red Crescent chuan a sawi.

International Federation of Red Cross & Red Crescent Societies (IFRC) Libya Secretary-General Marie el-Drese chuan Mediterranean kam khawpuiah hian chin hriat loh mi 10,100 vel an la awm bawk niin a sawi a. Damdawi ina thawkte chuan a hmain Derna-a thi hi mi 5,500 vel niin an lo sawi tawh a, ruah sur kaihhnawihah hian an ram chhung hmun dangah mi 170 an thi bawk.

Derna Mayor Abdel-Moneim al-Ghaithi chuan thi hi an vaiin 20,000 an tlin theih thu leh veng eng emaw zat chu tui lian hian a la vek hlawm niin a sawi.

Kum 2011-a hun rei tak ro lo rel tawh, Muammar Gaddafi-a paih thlak a nih atanga ram buai tak la ni, tuialhtheia hausa ram, Libya-a lawngchawlhna khawpui hi Pathianni zana tui lian hian chhungkaw tam tak chu a len.

“Second reilo te chhungin tui chim chin a sang nghal vak mai a ni,” tiin hliam tuar chunga dam chhuak pakhat chuan a sawi a. A nu nen zan rei tawh takah tuiin a la a, in ruak pakhatah a len lut hlauh niin a sawi.

“Tui chim chin a san zel avangin chhawng lina thleng kan chho a ni,” tiin damdawi in khum atangin a sawi a, a thu sawi hi Benghazi Medical Center-in an tichhuak a ni.

“Te ri kan hria a, tukverh atanga kan en chuan tuiin car leh mihring eng emaw zat a len ka hmu nghal a. Darkar khat emaw, khat leh a chanve emaw vel a ni ang; mahse, keini chuan kum khat ang maiin kan ngai,” a ti.

Libya khawchhak lamah ruah sur nasa kaihhnawihah hian mi 170 chuang an thi a. Bayda, Susa, Um Razaz leh Marj khuaah a ni hlawm tih Health Minister Othman Abduljalil chuan a sawi.

Rikrum thila che chhuak thinte chuan chirh leh hnawk karah dam chhuakte zawn hna an la thawk mek zel tih IFRC chuan Zirtawpni khan a sawi.

“Dama hmuh an la awm beiseina a la awm reng a ni,” tiin an hotu, Tamer Ramadan chuan a sawi.

INVUI KARAH RUANG ZAWNG
Derna-ah hian invui leh inphum tan a ni a, a tam ber hi thlan pakhatah dah an ni tih Abduljalil chuan a sawi.

Ningani tukah khan ruang 3,000 chuang phum a ni tawh a, ruang dang 2,000 buaipui zui mek a ni bawk a. Thi tam zawk hi Derna daia thlanah a huhova phum an ni a, an khaw thenawma thawn an awm nual bawk.

Abduljalil chuan khawpui lailia inah te rescue team-in mi zawn hna an thawk zui zel a, tui lut thiamte pawhin Derna hnaih tuipuiah an la zawng bawk tih a sawi.

Car leh in tlusawp intiang hi hmun thenkhatah chuan metre 4 laia sangte a nih hlawm avangin chirh leh hnawm karah hian mi tam tak an la awm rin a ni a. Chhanchhuah hna thawktute hian hnawk hai tur hian tui lianin kawngpui a lak leh dan a ngah avangin hmanraw lian an la lut thei rih lo bawk.

“He chhiatna thleng hi a rumin a na tak zet a ni,” tiin International Committee of the Red Cross (ICRC)-a Libya ram aiawh hotu, Yann Fridez chuan a sawi a, a hote nen Derna hi an tlawh  tawh bawk.

“Metre 7 zeta sang tui gfawn hian in leh thil dang tam tak tuipuiah a len lut a. Chhungkaw tam tak an kim lo va, ruangte chu tuiin vaukamah a ranw let chhuak leh bawk a, in tam tak a chhia a ni,” a ti.

ICRC chuang ruang dahna tur ip 6,000 sem tawhin Libyan Red Crescent Society chuan ‘ruangte tha taka hlawm dan tur’ a ngaihtuah ve thung.

World Health Organization leh tanpuitu pawl dang chuan Zirtawpni khan Libya-a thuneitute chu thlan pakhata a hlawma mi phum tawh rih lo turin an ngen.

“Thuneitute chu a ruala phum leh hal ral hmanhmawh rum rum lo turin kan ngen a ni,” tiin biosafety & biosecurity-a medical officer Dr Kazunobu Kojima chuan a sawi.

INENKAWLNA THA LO
Kawngpui leh lei a chhiat nasat avangin Derna hi tlawhpawh a la har hle a, phone line pawh a chhia a, mi 30,000 vel chenna nei lovin an awm mek.

United Nations chuan, “Kawng tam zawk a chhia a, Derna enkawltute hian puihna leh inthiar chhuahna atan tuipui atanga luhna tur an ngaihtuah thuai a ngai,” a ti.

UN hnuaia World Meteorological Organization chief Petteri Taalas chuan indona ramah hian emergency management system tha sela chuan thihna thleng tam tak chu pumpelh theih a nih thu a sawi.

Inbiakpawhna leh indawrna tha sela chuan ‘inralrinna leh rikruma che chhuak thinte an inring ang a, mi tam tak thiar chhuah an ni ang a, mihring tam tak inchhan theih' a nih thu a sawi.

Kar tir lamah khan Derna Deputy Mayor Ahmed Madroud chuan Al Jazeera hnenah tuikhuahte hi kum 2002 atang khan enkawl mumal a ni tawh lo niin a sawi.

Sadeq Institute dintu leh an director ni mek, Anas El Gomati chuan khawchhak lama roreltute chu khawpui thil pawimawh an ngaihthahin an enkawl tha lo niin a sawi bawk.

“Ei rukna leh sum leh pai hman thiam lohna hian Libya ram hi kum tam tak dinhmun chhiaah a dah tawh a ni,” a ti.