Aizawl: Kum 2008 atanga kumin 2022 (October) chhungin, current line chhia siam laia current-in a man vanga nunna chân mi 22 an awm tawh a, chung zinga mi 14-te chu P&E mi leh sa an ni a, mi dang pariat chu civil mi an ni. Kum 2008-2022 (October) chhunga nunna chânte zangnadawmna pek chu Rs. 31,54,775 a tling.

ZALEN-in RTI hmanga zawhna a siam, Power & Electricity department-a SPIO-in a chhan danin kum 2019 leh kumin 2022, October chhungin current line chhia siam laia nunna chân mi pali ve ve an awm a, heng kumte hi nunna chân awm tam kum a ni.

Hetihlai hian RTI chhannain a huam loh, tun November 3 khan Lawngtlai AOC-ah current line chhe siam lai P&E mi leh sa chu current man vangin a boral leh tawh bawk.

Kum 2008 atanga kumin October thlenga nunna chân zingah P&E mi leh sa 14 awmin, chungte chu SA/EW/PE/MR te an ni a, mi dang pariat chu civil mi an ni.

SPIO tar lan danin current line chhia siam laia current-in a man vanga vanduaina thlenna chhan chu safety glove, helmet, belt hman taimak tawk loh vang te, shutdown lak laia inbiakpawhna that tawk loh vang leh current leak leh thil dangte niin, vanduaina thlenga mawhphurtu hrem pakhat a awm tawh a, compulsory retirement pek a ni.

Chhiatna a thlen lohna turin department-in hmalakna hrang hrang a nei thin a, shutdown la dan chungchang leh line nunga hna thawh loh tur chungchangte leh inven dan tur a khât tawkin circular tihchhuah thin
a ni.

Thihna thlen dan:

Kum    Mitthi    Hmun
2008     1            Phulmawi
2009     1            Vairengte
2010     3            Phuaibuang, Tuichawng, Vanbawng
2011     -    -
2012     1            Saitual
2013     1            Phullen
2014     -    -
2015     -    -
2016     3            Hmunhmeltha, Lengte, N. Vanlaiphai
2017     1            Vairengte
2018     -    -
2019     4            Luglei Rahsi veng ;  Ramthar, Lunglei, L.Chanmari (Serchhip)
2020     2            Dawn (Lunglei), Chawntlangpui
2021     1            Sakawrdai
2022 (Oct) 4       Hortoki, Rulkual