Aizawl July 17, 2023 : Tukin Zing dar thum vel khan Tumpang lui leh New Eden inkarah Ashoka Leyland body siam danglam atangin Kuhva thawhnem tak man a ni a, a kuhva phurh hi bun tir niin halral nghal a ni. Kuhva hi Zuangtui, Aizawl atanga rawn phurh niin hriat a ni.

Kawrthah atanga ZALEN thudawn danin he motor hian Kawrthah leh Zamuang lam kal lovin Tuidam lam atangin a bungraw phurh te hi Tripura lamah luhpui a tum a, Hachhek Kuhna ching volunteer ten ringhlein an lo ti ding a, ngun taka an enchian hnuah a body siam danglamah hian Kuhva hi a lo phur tih an hmu ta a ni.

Thudawnna in a sawi dan chuan truck body siam danglam chungah hian glass tiles keh te, thermocol leh hnawmhnawk chi hrang hrang an phur a, anmahni hian balu phur tur angin an insawi a, bawlhhlawh hi chu a remchanga paih mai tur niin an sawi bawk. Kuhva neitu hi vai niin sawi a ni.

Lirthei khalhtu sawi hmangin Mamit check gate-ah hian balu phur tur leh bawlhhlawh te chu remchanga paih tur a insawiin, entry te pawh an ti fel thlap a, buaina pawh tawk lo turah an inngai a ni.