August 16, 2023; Mizoramah May 31, 2023 thleng khan lirthei 2,91,883 ziah luh a ni a, chu'ng zinga 89,225 chu chhiah pek tur ang pe kim lo an ni a, vawiin atangin penalty chawi lo a chhiah pekna hun hawn tan a ni.

Transport department hotute chuan chhiah pek loh vanga lirthei document thi leh driving license nung lo chunga lirthei khalh chu danin a khap bakah a him lo tih an sawi a, "Accident tawh pawhin insurance policy la dam mah se, accident claim theih a ni lo," an ti a, chhiah pek loh vang leh license nun loh vangin mi tam takin harsatna an tawh mek thu an sawi.

Lirthei chhiah pe kim lo te bakah hian, Mizoramah driving license nei mi 4,83,312 an awm a, chu'ng zinga eng emaw zat chu tihnun (renew) ngai tawh an ni bawk.

Transport department chuan penalty tel loa lirthei leh driving licence chhiah bate pek theihna hun 'KHAWNGAIHNA HUN (Grace Period)' chu vawiin a tanga December, 31 2023 thleng a huam ang. Lirthei neitu leh driving licence neitu chhiah bate hmang tangkai tura ngen leh hriattir an ni a. Hun tiam chhung hian DTO Office kal kher loin online system kal tlangin pek theih a ni.