Aizawl: Mizoram sawrkar chuan lirthei chhiah lak dan thar tur The Mizoram Motor Vehicles (Taxation) Act, 2019 (Act No. 13 of 2019) chu hman theih tura pawm tawhin Mizoram Gazette-ah tihchhuah a ni tawh a, kar leh lam atang hian hman tan theih beisei a ni.

Transport Department atanga thudawn danin lirthei chhiah lak dan thar atana hman tur software chu tlema fel lohna a awm avangin Delhi lamah thawn thlak leh a ni a, kar leh lam atang chuan hman theihin a awm tawh an beisei niin thudawnna chuan ZALEN a hrilh bawk a ni.

He lirthei chhiah lak dan turah hian lirthei neitute chuan lirthei tharah chhiah hi kum 15 atan pek tur a ni a, hei hi tum khata pek tlak theih a nih bakah tum hnih ang pawhin a pek theih a, tum thum pawhin a pek theih bawk.

Lirthei chhiah hi tum khata pek tlak a nih loh chuan kum nga dana pek tur a ni a, kum 15 pek a nih dawn chuan chhiah hi lirthei man atanga za-a-paruk (6%) pek tur a ni. Tum hniha pe duh tan tum khatnaah kum sawm atana pek tur a ni a, kum 10 atan lirthei man atanga 4.2% hi chiah atan pek tur a ni a, a bak kum nga hi kum sawm a tlin hnuah 2.2% chhiah pek leh tur a ni.

Tum thumna pe duh tan kum nga dan zela pek tur niin, a hmasaberah a lirthei man atanga 2.2% chhiah a pe anga, chutiang zelin kum nga dang atan pawh 2.2% zel chhiah hi a pe ang.

He chhiah pekna dan thar The Mizoram Motor Vehicles (Taxation) Act, 2019 (Act No. 13 of 2019) hian a hma lama hman thin Mizoram Motor Vehicles (Taxation) Act, 1996 hnuaia sub-section (3) of Section 3 chu a thlak dawn a ni.