Aizawl June 23, 2024 : Tun hnaia lirthei registration number inang hmuhchhuah chungchangah Aizawl Traffic Police-ten Bawngkawn P/S-ah FIR an thehlut a, police-in hma an la mek.

Transport department-in RTI zawhna an chhannaah lirthei registration hi Vahan 4.0 software atanga tih vek a nih avangin number inang a awm thei lo va. Chutih laiin, mi lirthei number ang lo bel ve ringawt an awm thin tih hriat a ni a, a tul angin police-in hma an la tih an sawi.

Zawhna chhangin transport department SPIO chuan January 1, 2024 atanga May 31 2024 chhungin Mizoramah lirthei 13,607 register a ni tih a sawi a, hemi hun chhunga DTO hrang hrang a lirthei register zat chu Aizawlah 9,578, Lungleiah 1,221, Siaha-ah 291, Champhaiah 734, Kolasib-ah 665, Serchhipah 375, Lawngtlaiah 503 leh Mamitah 240 te a ni a. Heng lirthei register zingah hian two wheeler tam berin 9,341 ziah luh a ni a, motor car 2,049 leh goods carrier 942 ten an dawt a ni.

January 1, 2024 atanga May 31, 2024 chhung hian Mizoram sawrkarin lirthei chhiah chi hrang hrang (MV Tax) atangin sum Rs. 8,07,71,857.00 a hmu bawk.