Lo neitu pawl hrang hrangte chuan Inrinni khan India ram chhunga Raj Bhavan panin kawng an zawh hlawm a, hei hi sorkar laipuiin lo neihna dan kalhmang pathum a siam an duh lohna lantirna kum hnihna puala an tih a ni.

Tun tuma kawng an zawhah hi sorkarin an laka thu an tiam eng emaw zat an tihpuitlin lohte nawrna a nih bawk thu an hruaitute chuan an sawi.

Lo neitu pawl hruaitute chuan sorkarin minimum support price (MSP) chungchangah dan siama inrawn khawm pawh an koh tur thu an tiam, tun thlengin an la ti lo tih an sawi.

Farm law tia sawi mai pathum, sorkar laipuiin a siam chu duh lo leh hlih leh ngiatin lo neitu, a tam zawk Punjab, Haryana leh Uttar Pradesh-a mite chu Delhi ramri-ah kum khat chuang an pung khawm a. Prime Minister Narendra Modi chuan nikum November khan dante hi hman loh tura hnuh kir a nih thu a puang.

Dan duh loh lantirna pawh tihtawp zui a ni.

“Ziakin kan thil phut tihhlawhtlinna tur an tiam teuh va; mahse, tih a la awm lo. Sorkar hi phatsantu, ram chhunga lo neitute bumtu a ni tih a chiang a. Corporate-te chauh an vulh a, kan duh tihhlawhtlin tumna a nei lo,” tiin Samyukta Kisan Morcha (SKM) hruaitu, Hannan Mollah chuan Press Trust of India hnenah a sawi.

Mollah hi Lucknow khawpuia Inrinnia lungawi lohna kawng zawhah a tel.

Farm law duh loh lantirnaa a bultumtu ber pawl, SKM hi December 8-ah an thukhawm dawn a, an kal zel dan tur an rel ang.