Kar khat kan inkhung ta. Kar hnih dang kan la bak a, hlain, “Nghak hram la phun nawi mai lo vin,” a tih ang deuh khan, phun nawi lovin i tuar hram hram ang u. Mi thenkhat chuan ni 21 chhung tehmeuh han inkharkhip chu a lutuk deuh kan ti a ni mai thei. Mahse, India ram mipui nawlpui dinhmun han thlir i la, kan deldulzia te, kan inchiahpiah nasatzia te, sakhaw puithiam zingah meuh pawh virus laka himnaa ngaia bawng zun lo in duh mai kan awmzia te ngaihtuah chuan ni 21 chhung inkharkhip tlat (total lockdown) hi tih makmawh, kan himna awmchhun a ni.

Vanneihthlak takin (han ti ila) he coronavirus hi ram changkangah a darh hmasa a. Ram changkang vak lo, India emaw, Africa emaw atanga darh tan ni se kan va tuar nasa dawn em! Nasa taka kan phek buai laiin ram changkang zawkte chu an lo inzir fing fe hman ang a, chuti takin an buai lo mai thei. Ram changkang Italy leh USA te meuh pawh an chesual a, an muang sual a ni a, he an lo chetsual tawhna hi keini hian inzir fin nan i hmang mawlh ang u. Pawn chhuak loa han inkharkhip ngat ngat mai chu naupang mawlh an khawngaihthlak. Puitling chuan inkharkhip (lockdown) pawimawhzia te, hri leng hlauhawmzia te, inkaichhawn awlsamzia te kan hria a, kan tuar thei mai. Naupang erawh an ni ve lo. Nihhlei rual, che loa awm thei lo, thian mamawh em em an ni a, thla khat dawn pawn chhuak loa tawm tlawk tlawk chu an tan a ninawm viau ang. Chuvangin inchhungah na na na chuan an duh tawka an ninhlei i phalsak ang u. Lockdown chhung chuan in pawh hnawk deuh mai rawh se.

Lockdown tir lam khan, “Tih tur a awm chuang lo, ni a rei mai mai, tukthuan pawh ei hma a ngai lo,” kan ti a. Mahse, a lo ni ber lo. Pawn kan chhuak thei lo a, ni tin khawsak phung a khaihlak a, chhungkaw khawsak phung leh zel chu i tikhaihlak lo ang u. A hun takah tukthuan ei ila, a hun takah chhun thingpui in ila, a hun takah zanriah ei ila, a hun takah mu ila, a hun takah i tho hram hram ang u. Tih tur a awm chuang lo tih vanga zingah duh chen chen mut a, hunbi awm loa riltam hun huna chaw kan ei mai hian kan hriselnain nasa takin a tuar thei. Lockdown chhung zawng chhun zan zawma mut nana kan hman chuan a ninawm sam khawp ang, depression reu reu kan nei ang tih hlauawmin. Nunphung pangngai lo lutuk tan thil reng reng hi a ninawm sam bik. Tih tur kan hre vak lo a nih pawhin phone bih nileng ringawt loin lehkhabu i chhiar ang u.

Ni danga kan chhiar hman loh, chhiar atana tha kan tih si kha tun hi a chhiar hun tak a ni. Tin, harsatnate hi a hmang tangkai duh tan chuan hming chherna hun tha a ni hlauh thei. Ram buai laia tan in hrehawm taka an tan lai khan James Dokhuma khan, ‘Tih tur a awm chuang lo,” tiin mu mai mai se a hming a chher kher lo ang. Mahse, a lung in tan hun chu thil tangkai tih nan a hmang a, thawnthu ngaihnawm tak, ‘Thlahlei nga zan’ tih hi a ziak a, vawin thlengin BA (Mizo) zirlaiah telh a nih tak hi. Thu kan ziak thiam lo a nih pawhin mi ziak sa chu kan chhiar thiam vek a; chuvangin, he inkharkhip chhung hi lehkhabu chhiar nan, hriatna tihzauhna hun remchanga i hmang hlauh ang u.

Lockdown laia ka rilrua thil lo awm pakhat chu ei leh bara intodelh pawimawhzia hi a ni. Khawvel a la awm zelte a nih chuan tun lo hi hun harsa leh khirh tak pawh kan la hmachhawn leh ang. Chutih hunah hlei hlei chuan ei leh bara intodelh pawimawhzia hi kan la hre dawn chauh a ni. State puitling kan nih atang pawhin kum 30 chuang a lo vei ta. Ei leh bara intodelh hi a hun ta viau mai. Mahse, vawiin thlengin kan la intodelh si lo. Kan intodelh lo mai ni lovin kar hnih khat lek Silchar kawng a pin pawhin kan buai chhe hman der chu a ni si. State puitling kan nih hnua sawrkarna fung chelh tawh zawng zawngte hian ei leh bara kan intodelh thei dan hi an la hre fuh thei lo nge, an la ti fuh thei lo zawk? Nge, tumna tak tak an nei lo zawk? Garden colony, NLUP, NLUP tha mi, MIP, NEDP, tunah SEDP, a enga mah kan la hlawhtlin pui tak tak lo. Chuvangin, tun ang hun harsa kan tawh mek hi sawrkar leh mipui hian ei bara intodelh pawimawh zia hriat thar nan hmang i la, ei bara intodelh tura tan lak hi kan hnapui ber lo ni teh se.