Khum tlâng chu bêlin a la tap kauh kauh reng a—zîng dâr thum lah chu a pelhna a rei tawh hle si a. Chû hmeichhe naupang tê Mali chu, a nu khawvêla a awm ve tawh dawn loh avanga tap a ni; tûnah kum sawm mi chauh a la ni si!

‘Nâ’ a ti thiam ve tawh a; ‘tah’ awmzia tak tak a hre thiam thar chiang hle a; ‘mittui nihna leh ze dik tak’ chu zirtir chawp a ngai lo chiang ta hle mai bawk! Lungngaih-hrehawmna leh khawharnate chu ‘a thû’ maia hriat thiam chi rual an nih lohzia te nên lam paw’n.

A kiangah chuan a pa a thu ve lo! Thil a hriat thiam tak tak hma, kum hnih a tlin hmain a boral tawh si a. A pî, kum 80 dâwn tawh leh a nutei nên tlawng a ni, a nu ruang chu an kil ni. Mi dang, an chhûngte emaw khawtlâng mi emaw thu khâwma Mali nu ruang lumenpui chu a rem tawh si lo! Sorkar leh khawtlang thûa inkhârkhipna (lockdown) kalpui lai a ni si a. A nû ruang kîla mal êm êma Mali tap keuh keuh chu thil thlîr nuam a va ni lo chiang êm!

Zan dang chu ni se, an vêng thalai rual chuan mut chhuak pawh sawi loin a nu ruang chu an lumenpui ngei ang a. An zai thâwm chuan anni pî-tû khawhar lutuk tûr leh an lungngai lutuk tûrte chu an hnêm ve ngei tûr hi a ni a. Tin, anni paw’n a tuar dân dân pawh an thiam phah deuh mahna le!

A nu chuan hun rei tak a lo tuar tawh a natna chu, damdawi ina an inenkawl fê hnua ina an inenkawl zui leh hnuah a thihpui ta si a! A hmabâk khawvêla kê a chheh leh zêlna tura hniak pên dân zirtîrtu tûr ber a nu chuan.

Chu chu nizân mai kha a ni. Vawiin hian a nu ruang chu thlânmual hluia a pâ thlânah an zalh ve tawh dâwn a ni. An vêng YMA hruaitu thlan chhuah bîk mi tlem tê-in a nu thlahna hun chu an buatsaih mai dâwn a ni.

Kâwla ni thar rawn chhuak tûr inphan de sur mai chu a mawi ngei mai. Mahse, chu ni thar chu Mali tân chuan a mawi ve thei tawh tlat lo, a duhawmna a hloh zo ta si a! Tu nge mahni nu thlahna tûra ni chhuak mawi ti ngai ang le? Chutah pawh, a pî, a nutê-i leh an chhûng hnai tak tak bâkah a mi hriat ngai lêm loh mi tlemtê te nên chauh …

Mali chu mal tak a ni!

~

Ka pû, lollipop hi chêng eng zat man nge?’ tiin mipa naupang fel ve fê tawh, Fela chuan dâwr neitupa chu a zâwt a.

Chû dâwr an hawn zuai hun chu Fela chuan a chhak deuh atangin rei fê a lo nghâk tawh a. A kutah chuan thla hmasaa a thir-chhe hralhna pawisa a la dahthat khiau, chêng nga thîr chu a hûm thlan hluam mai a.

‘Chêng ngâ,’ tiin dâwr neitupa chuan a lo chhâng bung deuh hmuk a. Leina a nei daih e!

Nî danga chêng hnih man ni thin kha, tûnah chuan chêng nga man a ni ta! Chutah, a bâwmah chuan pakhat chauh a awm tlawng tawh lehnghal! Chû bâwm atang tho chuan chêng hnihin a lei reng thin si a—lockdown, a hriat thiam ve dânin, ‘chhuah phal loh’ a nih hmâ pawn! Mahse, Fela chuan, ‘Hmânah pawh … tûnah engati ta nge?’ tia sawi buai chu a tum teuh lo mai.

‘E… kei aiin naupang dangin an ei châk zâwk ang, mi dang lei a’n ka khêk zâwk mai ang,’ tiin thil dang lei tûr niâwm deuh hian a’n hawi kual vêl a. Naupang lawmzâwng eng mah an zuar tawh si lo; dâwr chu a ruak huai tawh mai si a.

Dâwrkai pa chuan, ‘Aw, lei zo law law mai la … ka khâr lehnghal dawn a nia,’ a ti a.

‘A ngai lo e. A-nu’n atta a kang dawn… e, a kang têp tawh ang… a pawi lo mai,’ tiin dâwr inhawng zuai chu a kalsan ta a.

A hâw kawngah chuan an thenawma awm, a aia naupang daih zâwk, Thara leh Tharite unau, bisikût inchuha lo inhau tap chu a hmu a. Engtin mah ti lo mah se, a ngaihtuahna chu a hruai thui ngei mai. Tharate chhûngkua chu tûkina a pa’n ‘dal’ a va thensak te kha an ni ngei tih te chu a hre chhuak a.

A nu chuan an chhûngkaw chhûn thingpui hmeh tûr atta chu a kang zo a. Pêr khat a ei ve. Atta dahna bêl awmna lam chu a pan zawk a…

Chanchinbu hlui an dah khâwmna ami chanchinbu phêk khat a pawt thla leh a. A thil kente chu a chhûngte hmuh hlau tak chungin pindanah a lût ta daih a. Ziak loh puana ‘Thara leh Thari’ tih a ziah chu a chanchinbu pawh thlâkah chuan a târ a; a tawngtai zui ta reuh a. Tharate in lam pan chuan a tlân chhuak ta nghal a.

A va thlen chuan Tharate kawngkapui chu a lo inkhâr a. Luh chu a tum lêm lo; a pa’n mi ina lên a phal miau loh avangin. A thil ken chu an kawngkapui bulah chuan a dah ta ringawt a. A chhak deuh barel chung atangin ui leh zawhte kal thei tûr te chu vêngin a thu rân a. Rei pawh a thut hmain Thari chuan titau tih hriat fêin kawngka chu a rawn hawng a. A thil dah a chhar chu a hmû a. Mak ti tak chungin in chhûng a luhpui a.

‘Remruatfel…’ tia thinrima au chiam mai chu a nu a ni tih Fela chuan a hai lo. Inah an inhruai hâw a.

‘Engati nge i lo va vah chhuah leh a? Ka atta kan kha i ei zo lo chiang lutuk. Khaw’nge i dah? Ka vaw dâwn khawp che…’ tih leh pâwna hmunphiah va lâk chu a rùal a.

‘Thara leh Tharite saw … an ril a tâm lutuk a. Nichinah ka hmu a…’ a ti ta a…

A nu chuan Fela thusawi chu a hre pha tawh si lo a…