Lockdown laia Taksa hrisel neih dan!

Admin - May 09, 2021

Zan Mut that | Pawn chhuah | Taksa sawi zawi | Tui in tam | Ei leh In tha |

Lockdown lai chuan mitin kan nguai a, taksa a che tlemin hrisel lohna hial pawh a thlen thei. Taksa sawizawi a tha tih hre mah ila pawn chhuah a remchang lo a, in lamah mahni tawka exercise lak bak tih theih vak a awm lo. 

Media khawvelah kan chen miau tawh avangin smartphone, laptop leh computer kan khawih nasa a, taksa hah si loin mit a rim hle ringawt - hei hi mit tan chauh ni loin kan taksa hriselna atan pawh a pawi em em a ni. 

Lockdown laia taksa hrisel nei tura mithiam ten inenkawl dan tur an sawi hrang hrangte chu - 
Zan mut that 
Taksa hriselna atana thil tha tak pakhat chu zan mut that hi a ni. Tinge zan kan tih kher kan tih chuan, chhuna mut vak vaka zana tlaivar leh deuh thaw si hi taksain a haw em em a, mitin a tuar hle bawk. Mithiamte chuan zan mut that hi hriselna atana thil pawimawh berte zinga mi a nih thu an sawi uar hle - chhunah mu loin zanah mut thin tur a nih chu! 

Lockdown lai a ni thoa a tukah ka mu mai ang tiin zanah i lo meng vak vak thin a nih chuan sim nghal hmak ang che. Mithiam te chuan mihringte hian hriselna atan darkar ruk atanga darkar riat tal mut kan mamawh tih an sawi.

Pawn chhuah!
Lockdown laia pawn chhuah lo sawi mawi chu a fuh kher lo mai thei. Mahse mithiamte chuan pawn chhuah hian thatna a neih thu an sawi a, ni eng hian taksa tan vitamin D a pek avangin pawn chhuaha nisa te pawh do ve thin tur a ni - ruh tan a tha an tibawk.  
Zingkara han hawi thawven zuaite hi a tha a, inah kan tawm a nih pawhin a him chinah hawi thaw ven ve chang neih hi rilru hriselna atan pawh a tangkai hle niin an tarlang bawk. 

Taksa sawi zawi
Sawi thui vak a ngai lo, taksa sawizawi hi mihring hriselna atana an tih makmawh zinga mi a ni. Lockdown lai erawh chuan duh anga pawn chhuah a remchan loh avangin mahni in lamah hunbi mumal tak neia taksa sawi zawi hi hriselna atan a tangkai em em a ni. 

Tui in tam
Tui in tam hi hriselna atana thil pawimawh tak pakhat a ni a, kan taksain a mawh tawk a hmuh loh chuan luna leh natna dang dang a thlen thei a ni. Taksa hrisel tak nei tur chuan ni khatah tui no ruk atanga no riat inkar vel tal kan mamawh a ni. 

Ei leh in lam
Ei leh in hi taksa hriselna atan a pawimawh tih chu sawi nawn ngai lo khawpa kan hriat sa a ni - mithiam te chuan taksa a hahdam lutuk chuan ei leh in pawh chin tawk hriat a ngai leh zual tih an sawi. Taksa sawi zawi si loa ei leh in tih nasat hian thau lutukna te a then a, zunthum nei tan phei chuan tih loh tawp tur a ni. 

Heng a chunga tarlan hrang hrang bakah hian kut sil fai that chu hriselna atan thil pawimawh tak a ni bawk. Kut hi ei leh in tur kan khawihna a nih avangin awlsam taka hri kan kai thei a, sahbawn nen uluk taka sil thin tur a ni.  

Share now