Aizawl: Mizoram sawrkarin lockdown (inkharkhip) a puan avangin thisen pek kawngah harsatna a awm a, blood bank hrang hrang ten thisen an nei tlem nia thudawn a ni.

ZALEN in Mizorama blood bank lian ber leh mipui pan tam ber Aizawl Civil Hospital thawktu te a biakna ah thisen neih khawl sa an neih tlem avangin harsatna an tawk deuh tih an sawi a, "Harsatna hi kan tawk deuh a, mahse kan la awm thei hram hram a, a hma ang chu kan ni lo," an ti.

Aizawl Civil Hospital a Blood Bank Officer Dr. K.Rothangpuia chuan, "Harsatna tawh chang hi nei mah ila Association for Voluntary Blood Donation (AVBD) te, NSS leh mi tlawmngai te avangin thlaphang lutuk lovin kan awm thei thin a, kan lawm hle a ni," a ti a. Tunhnaia hri leng hluar thar leh avangin Blood donation camp neih tum te pawhin an thulh nia sawiin camp nei thei an awm chuan an pan thei zel niin a sawi bawk.

Aizawl Civil Hospital Blood Bank hi mimal enkawl damdawi in te chuan an tawm a, private damdawi in te hian thla tin Rs. 50,000 chu lawmthu sawi na'n an pe a. He sum hmang hian Aizawl Civil Hospital Blood Bank hian thawktu (technician) an ruai ve leh thin a ni.