Aizawl; March 11, 2019-a larsapin chairman a lak luh hnua a taka hna thawk tan, Mizoram Lokayukta chuan vawiin thlengin thil chhuitu tur, Investigation Wing hran a la nei lo. Hetihlai hian a din tirh atanga kumin thlengin eiruk thubuai chhui tur 47 a dawng tawh.

ZALEN thudawn danin Lokayukta hian Investigation Wing a la neih loh avang hian complaint an dawn, chhui chian ngai nia an hriatte chu ACB emaw, CBI emaw an chhuitir thei a. CBI chhuitir tur erawh chuan state sorkarin phalna a pek a ngai thung.

Mizoram Lokayukta chhinchhiah danin vawiin thlenga thubuai a dawn tawh 47 zinga 15 chu titawpin, regular investigation 14 neih mek a ni a, thubuai 32-ah chhui chianna hmasa/preliminary enquiry (PE) neih tawh a ni a, PE report 28 dawng tawhin, PE la tihfel loh (pending) 13 a awm a, thubuai pathum chu PE neih hmaa chin fel a ni.

Lakayukta hotute hnen atanga ZALEN thudawn danin, Investigation Wing an neih chuan thubuai chhuina kawngah tun aia chak zawkin hnathawh theih a ni dawn a. Sawrkar thuhnuaiah an awm dawn loh avangin, sawrkar mi leh sa an chhui pawhin, zalen zawkin thil chhui hna an thawk thei dawn bawk.

Mizoram Lokayukta hian tun dinhmunah Investigation Wing hran la nei lo mah se Prosecution Wing-ah erawh mi pakhat an nei tawh thung.