US leh Mexico inrina bul hnaia awm San Antonio, Texas-ah an ram huna Thawhtanni khan Lorry chhungah ruang 46 zet hmuh chhuah a ni a, mi 16 te erawh an lo la dam hlauh. Kawngpui sira motor lian an kalsan lorry chhungah hian mi eng emaw zat an chuang tih report a awm a, hei hi bawhzuiin ruang thahnem tak hi hmuhchhuah a ni ta a ni. 

He thil thleng hi mihring hmanga sumdawnna nen thuk takin a inzawm tih hriat a ni a, a chhunga chuangte pawh hi hralh atana man khawmte an ni. Lorry chhungah hian mi 62 an chuang a, mi 16 an dam chhuak. Dam chhuak zingah hian naupang pali an tel a, hospital panpui an ni. 
 
San Antonio Mayor Ron Nirenberg chuan pawikhawihna rapthlak tak a nih thu leh, dam chhuakte chu an chhungte zawn chhuahsak an nih tur thu a sawi. Mexico Foreign Minister Marcelo Ebrard chuan dam chhuak zinga mi pahnihte chu Guatemala mi an nih thu leh, midangte erawh tute nge an nih hriat mai theih a la nih loh thu a sawi. 

He thil thlenna hmun hi US-Mexican border atanga 250km vel a ni a, mihring hmanga sumdawnna kalkawng pakhat a ni. Human trafficker te chuan lorry hmang hian mihring an phur kual fo thin a, US hmun hrang hrangah an hralh leh thin a ni.