December 20, 2022; Mizoram sawrkarin December ni 1, 2022 atangin Aizawl Municipal Corporation area leh district khawpui zawng zawngah LPG home delivery turin ruahmanna siam mahse, vawiin thlengin a la hlawhtling thei lo a, veng tam takah common point delivery ah gas sem chhunzawm zel a la ni.

ZALEN thudawn danin, Aizawl veng engemawzatah LPG home delivery hi a takin kalpui a la ni lo a, gas agency te ruahmanna angin common point delivery ah sem a la ni a, home delivery a taka tihhlawhtlin a la nih loh nachhan hi mipui lamin a kalphung tur an la hriatthiam tawk loh vang a ni pakhat nia thudawn a ni.

LPG Home Delivery hi a enchhin nan (pilot basis) AMC huamchhunga veng 4 ah May ni 5, 2019 atangin kalpui tan a ni a. He ruahmanna hlawhtling taka kalpui a nih thei nan inrawnkhawmna leh sawihona tum engemaw zat IOCL hotute, LPG distributor-te, Local Council hruaitute, NGO aiawhte bakah consumer aiawh ten an nei tawh.