LPS Cup inter village football tournament-a tel tur tan February 10 thlengin ni 25 chhung inziahna hun hawn a ni a, February 20-ah khelh tan a ni ang.

Aizawl District Football Association chuan a tirah January 31 thleng tel tum tan hun hawng mah se a tidanglam a, January 15 atanga February 10 chhungin Younix Sportswear, LPS Building, Zarkawtah team pakhat tan Rs. 2,000 zelin a inziah luh theih dawn a ni.

Aizawl district chhunga veng leh khaw hrang hrang bakah district dang atanga sawm bikte inelna turah hian inkaihhruaina mumal tak siam a ni a, player-in vote a neihna team tan a khelh a ngai a, November, 2023 hnu lama vote neihna sawn pawm a ni dawn lo.

Voter identity card hmangin player endik an ni dawn a, kum tling lote erawh chu ‘Digital Birth Certificate’ hmanga endik an ni ang.

Team pakhatin an awmna veng emaw, khua emaw tel ve lo tur atangin player panga an la thei a, chutih rualin pathum aia tamin a rualin an khel thei dawn lo a ni.

February 20-ah khelh tan a ni dawn a, round of 16 atanga final thlengin LPS 1-ah inkhel zawng zawng live-a pek chhuah tur a ni a, tournament tan ni atanga round of 16 hma zawng inkhel a awm ni apiangin LPS-in report siamin zan dar 7:45-ah LPS 1-ah tihchhuah thin a ni bawk ang.

Quarterfinal lutte team li ve vein group hnihah then an ni dawn a, group khata awm team-te vawi khat an inkhelh kual hnua a sang pahnih ve vein semifinal an lut ang.

Champion team-in trophy leh Rs 1,50,000, pahnihnain trophy leh Rs 70,000, semifinal-a tla team pahnih hnenah Rs 20,000 ve ve an dawng dawn a. Fair play lawmman Rs 10,000 bakah best player leh top scorer hnenah trophy leh Rs 5,000 ve ve hlan a ni dawn a ni.