Mahindra 2 Wheelers Mizoram Premier League season 2 final-a Chanmari FC nen an inkhelh tumin referee thutlukna siam avanga lungawi lo Luangmual FC fans te chuan Lammual-ah inkhelh ti khaihlak khawpin harsatna an thlen a, an chet dan avang hian Mizoram Football Association chuan an chungah hremna a lekkawh a, season khat atan Aizawl tlak lam team hlun hi an hrem a, mahse, Luangmual hian an chunga thutlukna hi khin let an tum lo a, season tharah hian Mizoram-a football inelna sang bera ngaih hi an khelh hmel ta loh. MPL final kha hriat theuh angin leg hniha khelh a ni a, khatah khan inkhel hmasa zawkah Luangmual hi 2-1 in an chak a, inkhel hnuhnung zawkah Chanmari lam hi 3-0 an chak ve thung. Inkhel hmasa zawk-ah khan Chanmari hian penalty hmangin si khat an thun a, kha penalty kha Luangmual hian pawm harsa an ti a, mahse, an chak zui tak avangin tha takin inkhel an tin. Inkhelh vawihnihnaah penalty sawi zui hlawh tak Chanmari lam hian an hmu leh zui a, he goal hi hmahruaina atan hmang zui nghalin inkhel hmasa lama an si phurh an sutna a ni zui. Chanmari hian goal khat dang Muankima hmangin an thun leh a, heng goal hnih avang hian Luangmual lam hian harsatna an thlen lem lo a, mahse, Jerry Mawihmingthanga goal thun, Chanmari FC player pakhatin a kut-a a lo khawih zeuh nia lang, mahse, referee-in goal-a a pawm tak chu Luangmual lam hian an hrethiam lo a, an player te chuan referee an chhuah chhal hnuah pahnih hnawh-chhuah an ni a, fans lungawi lohna chu rawn intam chhovin inkhelh tawp lamah harsatna an rawn thlen a, Lammual-ah inthunun harsa khawpin Luangmual fans an che a, thil duhawm lem loh tak a thleng. Chief Minister hialin demna thu a chhakchhuak a, MFA lam pawhin thu-chhuah an siam zui nghal a, season khat atana hrem tura tih an ni a, Lungmual FC lam chuan khing let lovin an pawm a, referee hi hrem chu ni ve se, an hremna hi khin let erawh an hreh lo. Referee lakah lawm lo Tarlan tawh ang leh hmuh angin kha inkhel pahnih-ah khan Luangmual hi an khingpui te lakah an lungawi lo a ni lo a, inkhel kaihruaitu referee thutluknaah an lawm lo a, khatiang kha mi dang chungah thleng ve lo se an duh. I-league khelh tuma theihtawp chhuah a, 2nd division I-League pawh tum hnih lo khelh tawh Luangmual FC lam chuan khatiang thutlukna kha hriatthiam harsa an ti. Luangmual FC neitupa Rotluanga chuan, "I-League qualifying pawh tum hnih kan lo khel ve tawh a, vai ho, hnamdang zawk ten game an thunun dan te pawh a takin kan lo hmu tawh a, kan tawng fo tawh thin, kan referee te anga thutlukna siam dik lo lutuk hi kan la tawng ngai lo. Kan referee te pawh hi mihring ve bawk an ni a, thil ti dik lo thei an ni, an tisualah chuan hrem ve ngam a tha. Sum tam tak seng zawk club te hrem ngam si a, thutlukna dik lo siam zawk an hrem leh si lo hi hriatthiam a har a ni," a ti. Season khat chawlh hreh lo Mimal club angah chuan Mizoram-ah club hlun ber pawl an ni tawh a, 1st division-ah rei tak an khelh hnuah Mizoram Premier League season-ah an inlan zui a, tum khat naah play-off khelh ngaiah awmin, an inhamtang hram a, season 2-ah erawh final hial an thleng leh thei a, mahse, season khat atan hrem tura tih an ni. Luangmual chuan hrem nih hi an pawi ti vak lo a, thutlukna chiah chu la siam lo mah se, an hremna hi khin let an tum loh hmel. Hrem an nih tur chungchangah hian Rotluanga chuan, "Khin let hi kan tum lem lo, club tan hian sum sen te hi a hautak em em a, chuvangin season khat te hi chu chawlh kan pawi ti lem lo, Club lam hian hemi chungchang hi kan la rel chiah lo a, mahse, khelh loh hi kan ti tluk tho ka ring," tiin ZALEN a hrilh. Luangmual Players te khawi lamah Luangmual FC hi I-League khelh tuma hun engemaw chen lo inpuahchah tawh an nih avang hian player pawh an nei tha a, tunah pawh hian an player te hi club dang pawhin an awh tak tak tur an awm nual. Mahse, an player te hi a ngheta chhuah tir an tum lo a, lakkir leh vek turin an chhuah lailawk tir dawn mai a ni. Luangmual FC hian season tawpa play-off khel turin MFA lam chuan an tiam niin an insawi a, hemi hunah hian an player te chu kohkir vek an tum a, MPL-ah hian tha zawka kir turin season tluana inpuachah pawh an tum niin an sawi a, an player te hi chan hlen an tum lo hle. Tunge Luangmual FC ai awh ang? MPL-ah club pariat an awm a, pakhat hi season tluan an hrem dawn tak avangin pasarih chiah an awm dawn, tunge Luangmual FC ai hi awh ang tih chu mi tam tak zawh-na a ni a, mahse, he chanchin ziah lai thleng hian an aiawh tur hi hriat a la ni lo. Hemi chungchangah hian MFA Honarary Secretary Lalnghinglova Hmar chuan, "Thutlukna engmah siam a la ni lo, hei hi committee leh board lamin an rel tur a ni a, engmah sawi theih a la awm lo," tiin ZALEN a hrilh. Anni aiawh tura hian club sawirik deuh te pawh an awm nia sawi a ni a, mahse, MFA lam chuan thutlukna an la neih loh vang leh committee an neih hunah an sawiho phawt tur thu leh general body meeting thlenga ngaihtuah a nih tur thu an sawi. MFA THUCHHUAK - "Mahindra Two Wheelers Mizoram Premier League Final, May 2, 2014 zana Lammuala khelha thil thleng chu ngun takin an ngaihtuah a, Luangmual FC fans thil tih dan chu hriatthiam harsa a ti a, khelmual chhunga inkhel tihtawp ngaia thil vawm luh mai duhtawk lo a, Lammuala thutna tur chair dah thar tichhiaa an vawm lut chu a dem a. Hetiang thil hi a thlen nawn tawh lohna turin Luangmual FC chu season khat chhung Mizoram Premier League khel lo turin a hrem (suspend). MFA chuan Lammuala Thutthleng chhiate hi siam that leh nghal ni se," a ti bawk.