Mizote hi kan changkang chho zel a, chung kan changkanna zinga pawi mawh leh tha ber tih theih hial tur chu faina leh thianghlimna kawnga kan changkanna hi a ni ang. Kan taksa mai bakah kan in leh lo, khawlai leh kan ram lui kan enkawlna kawnga hmasawnna nasa tak kan nei thei hi a lawmawm hle.

Kan ram lui kan thenfaina kawngah pawh nasa takin hma kan sawn zel a. Aizawlah kan lui hmingthang, Chite chu bawlhhlawh leh leivung avangin a thianghlim lo hle a; chuvangin, a humhalhtu tur Save Chite Lui Coordination Committee (SCLCC) hial din a ni a. An hmalakna avangin tunah chuan Chite pawh a thianghlim sawt ta hle a, chutih rual erawh chuan tunhma tluk tur erawh chuan hmalakna tur a la tam hle.

Chite mai ni lovin tunhnai maiah pawh Khatla South Local Council hmalakna in Vailui thenfai hnatlang neih a ni a, mi 400 vel hnatlangin bawlhhlawh tawihtheilo bag 403 leh satha ip bag 45 an paih hial a ni. Hetiang deuh bawk hian Lunglei lamah pawh Lunglei Town Sanitation Task Force buatsaihin Nghasih lui fintu Sipai lui thenfai hnatlang neih a lo ni tawh bawk a. Khaw hrang hrangin hmalakna hrang hrang an nei bawk a ni.

Tunah hian Aizawl tlak lam veng hrang hrangte chuan Tuikual lui leh Hnimtheilo lui thenfai hna an thawk leh mek a, hetianga lui thenfai pawimawhzia hriaa mipuite kan harh thar zel hi thil lawmawm tak a ni. Sawrkar laipui pawhin lui thenfai hi a ngai pawimawh a, project lian tak tak siamin Ganges leh lui dang thenfai hna an thawk mek a ni. Chite thenfai hna kan ngaih pawimawh rualin tlak lam lui thenfai kawngah hma kan lak a pawimawh hle.

Aizawl tlak lam lui leh thli te hi Tlawng luiah hian an lung lut a, kan khawpui tuilakna chu Tlawng a ni a, chuti a nih chuan Aizawl thli tenawm tak tak hi kan tui tlan ah chuan a luanglut tihna a ni. Chuvangin Aizawl tlak lam veng ten harhtharna changa lui thenfai hna an thawk hi thil lawmawm tak a ni a, tuna an hmalakna hi a bultanna ni se, tha thlah lovin nasa lehzualin hma la thei se a duhawm hle. Chutih rual chuan keini ramah chuan sawrkar hi kan innghahna a ni lo thei lo a, lui thenfai hna thawktu te fuihphur zawng leh an tha ti chak zawnga nasa lehzuala sawrkarin hma a lak a pawimawh hle.