Aizawl: Geology & Mining Minister Dr. R.Lalthangliana chuan, "Nakin lawkah chuan lung atang hian sum hnar tha tak kan la nei dawn a ni,"a ti.

Mining Minister Dr. Thangtea hian Zirtawp zan khan Luangmual-a Geology & Mining Directorate kawtah Geology & Mining department thawktute meeting a neihpui a, he hunah hian thu sawiin Dr. Thangtea chuan, "Bangladesh Commerce Minister nen kan indawr khan hmarcha, sawhthing, aieng tih vel mamawh tho mahse, lung an mamawhna a nasa a, Bhutan atang tein an lalut a, kan lungte hi an it em em a, nakin lawkah chuan lung atang hian sum hnar tha tak kan la nei dawn a ni," a ti. 

Dr.R.Lalthangliana chuan, October ni 31, 2022-a Nagaland-ah North East Geology & Mining Ministers' Conclave, ama Chairman-na hnuaiah an neih chungchang leh 2022 September ni 9 leh 10-a Hyderabad-a National Mines Ministers' Conference an neih thu a sawi a. Khatah khan Minor minerals (lung, balu, etc.) enkawl dan hi NE State zawng zawngah siam vek ni se, hei hi EF & CC Dept. nena harsatna a awm loh nan Geology & Mining kuta dah pumhlum a nih theih nan State tin hma la turin ngen an rel thu a sawi a. Pralhad Joshi, Hon'ble Minister, Coal & Mines chuan kha Conference-ah khan financial assistance Rs 5.0 crore chu NE state ten mineral haichhuahna leh zawnchhuahna tura infrastructure lam tih changtlunna atan pek nghal a tiam tih sawiin, hemi atan hian proposal siama thehlut turin Central sorkar chuan a rawn hriattir tawh niin a sawi bawk.

Tun dinhmunah Geology & Mining department hnuaiah hian thawktu 46 vel chauh an awm a. Heti chung hian kumina revenue an chhun luh hi cheng nuai 600 vel lai a tling a ni.