Aizawl: Tun hnai khan Lungleiah PRRS vei vawk 2 chu ser in mipuiah hralh a ni a, he thil titu lakah hian thubuai siam a ni.

Zalen palaiin thu a dawn danin khawchhak lam atanga lakluh vawk 4-te chu police-ten manin magistrate hnena hruai a nih hnuah endik a, dah hrang turin Magistrate chuan Police te a hriattir a. Police-ten a dahna an neih mai loh avangin vawk neitute hi lo enkawl chhunzawm turin an ti a. Vawk neitute hian magistrate leh Police te hriattir lovin PRRS vei vawk 2 hi an lo ser a, vawk neitute hi case 3, dan phal loha vawk lak luh, Court order zah lo leh rukruk thubuai siamsak an ni.

AH & Vety thawktute chuan Myanmar atanga a ruka vawk lakluhah PRRS an hmu tih loh chu Mizoram chhunga vawkah he natna hi an hmu lo tih Zalen an hrilh a, heti chung hian mit an lên reng niin an sawi. PRRS chu mihring tan a hlauhawm lo niin an sawi a; mahse, PRRS vei vawk sawngbawlna lamah vawk dangah a kai theih avangin fimkhur a ngai hle niin an sawi.