Aizawl January 22, 2024 : Lunglei District VC Association chuan Manipur buaina avanga Zofaten harsatna an tawh mek avanga tanpui nan, pawl pathum hnenah Rs 2,00,000/- (nuai hnih) an pe.

Lunglei District VC Association hruaitute chuan an district chhunga VC-70 chuang hnen aṭangin pawisa an dawng khawm a, chumi hmang chuan Manipur a Zofate tan tanpuina hi an pe niin an sawi. Tunlaia harsatna tâwk nasa Moreh atanga raltlante tuamhlawmtu Manipur Group YMA ten a tul apianga an hman atan Rs 1,00,000/- (nuai khat) an hlan a, ram chhan tura Frontline a Duty te hman atan Indigenous Tribal Leaders Forum (ITLF) hnenah Rs 50,000/- (sing nga) pein, Zomi Students Federation (ZSF) hnenah Rs 50,000/- (sing nga) an pe bawk.

Lunglei District VC Association hruaitute chuan Manipur a Zofa unaute tana pawisa thawhtu an huam chhunga VC zawng zawng chungah lawmthu an sawi a ni.

Tanpuina pawisa dawngtu Manipur Group YMA chuan, "Lunglei District VC Association-in Manipur Group YMA anpui nana ₹1,00,000 min pe hi ropui kan tiin, kan lawm takzet a. Manipur Group YMA-in hma a lak zelna turah a ṭangkai dawn hle a ni.

Lunglei District VC Association hi mi tam takte tana malsawmna a nih zel theih nan Lalpan malsawm rawh se," an ti.

ITLF leh ZSF te pawhin Lunglei District VC Association ten tanpuina pawisa an pe chu an thinlung chhungril takin lawmawm an tih thu leh tanpuina pawisa an dawn chu tangkai taka hman tur a nih bâkah ram chhan nana an thawh zelnaah anmahni fuih phurtu pawimawh tak a nih thu an sawi bawk a ni.