Aizawl July 11, 2023 : Lunglei Police te chuan R. Laltanpuia, Sethlun, Lunglei FIR thehluh bawhzuiin C. Lalawmpuia, 28 S/o C. Rokunga Sethlun kut atangin Kohhran leh mimal pawisa a ruk Cheng 2,70,000 atangin Cheng 2,68,095 chu darkar 24 chhungin an hmu kir a ni.

Lunglei Addl SP K. Beihmotaosa, MPS sawi danin R. Laltanpuia, Sethlun Lunglei hian July 9, 2023 khan an inkhawm hlanin an In chu karchhiat a nih avangin Police Station-ah FIR a thehlut a, an wardrobe chhunga BCM Sethlun Kohhran pawisa leh an chhungkaw pawisa tlem a zawng ruk chhuah niin a ziak a ni. Lunglei Police te hian Sethlun VDP te nen tangrualin C. Lalawmpuia chu thu zawhfiah turin an la a, 10/7/23 chhun dar 12:30-ah a in puang ta a ni a ti. A pawisa rukchhuah 2,70,000/- atangin Rs 2,68,095/- an hmukir leh a ni.

K. Beihmotaosa chuan rang taka rukru chhuichhuah a ni chu lawmawm a tih thu leh VDP te nen an thawhhona zar a nih thu a sawi a. Mitin te rukru laka kan him theih nan CCTV dah uar tur te, 'bar' vuah uar tur te leh Kohhran emaw NGO pawisa tam tham tak ina kawl loh a him a nia a hriat thu a sawi a. "Pathianni a inkhawm laiin rukru an chet thin avangin fimkhur zual a ngai a ni" a ti.