“Khatia ka taksa chak lohna avânga Kolkata-a ka kal kat kat thin lai khân…” a ti a, ka mi kawm pâ chuan.

“October thlâ te pawh khi … an bial ‘lui’!” a ti! A lunglènthlâk loh hmêl ê… ka ti!

Tih luihna avânga lunglèn tum ‘luih’ rêng rêng hi a lnglènthlâk ngaiin ka hre lo—ve tlat in a! Chutianga, “Va kal la, va lungléng vawng vawng rawh,” tia nawr luih chî zîngah chuan ka tel ve lo… chiang sak ina! Ka tan luih theih lohna lam tak a ni ngei ang!

Kei pek, Delhi-a lehkha zira ka awm lai khan, thian ka tawng a—ti ila, ‘tawn-sa-bawp-thian’ a ni ber ang chu—khâ Punjabi nulá kha. Ka in luah sírah hian huan (park) hi a awm a; ani chu tlai tin, insawizawiin a rawn tei chhuak thin—chû huanah chuan. Tin, kei pawh. Inhmu tlai tin ê ti lo chuan kan inbe ngai miah lo. Hnam lian leh chapo an ni a; a induh ve hle ni pawn ka hria.

Tlai khat erawh chu min be ve—êm êm ina a ti nge ni. A bialpa a ngai êm êm a—tin, tlai khua nuam a tih thû min hrilh chiam bawk. Awi! Delhi khaw lum hnuaia—tlai khua nuam zuk tih tlat pek chu—mak ka ti!

Chû Delhi khawpuiah chuan, khua hi a’n lunglênthlâk loh rapthlâk mai si a maw…! Ani a lo lunglêng tlat mai chu a lawmpuiawm fû; tin, faktlâk pawh a ni hial e, ka ti! October zân thla pawh an full moon ‘lui’ ve tâwk tâwk a ni si a. Tlai ni tla êng mawi kan tih ang te hi, an tla êng mawi ‘lui’ ve hrâm hrâm chauh a—tihluihnain min lunglèntîr! Chu chu ka lunglènpui ve thei ngai lo—khatia Delhi-a ka awm chhûng khan.

Ka inkawmngeih fé hnû chuan kan rama chawlh hmanga Aizâwla zinah ka sáwm ta alâwm, kan thenawm nû chu. Amah lah, company-a Executive ni pha ngat a lo ni bawk nên—hun nawm ber hun lai ’Vângpui khua chùan tûrin a rawn zin ta a.

Nuam a ti teh ê. A hawina lam apianga tlâng awm ringawt te; pawlh dal loh boruak thiang te; Hângi Lunglèn Tlâng leh Muthi Tlâng ringawt te, Chite kam te, khaw thlang lama Reiêk tlang lo inpharh phei duai mai te, tlâk lama Sairâng lui te … a! kan Zoram hrim hrim hi … nuam a va’n ti nasa tak!

Mahse, keini, a hmun neitu, awpa thut chilhtute erawh hi chuan, kan hmu reng a; mahse, kan ngaisâng si lo!

Min lunglènpui thintute hi an fakawm teh e aw … ka ti thin. Mahse, tûnah hian kan zînga lunglènpui tak mi hi kan va’n váng ta si êm aw…! Lungléng lui thei khawvêl hi a nêpin a chêp ta si a; an thu leh hla a ril ta si lo!

Hla phuahtute pawh hi… ka ti mai mai thin—lungléng lo chunga hla phuah hre chat chat thei niin ka inhre ve roh pek a—lunglènthlâk hek loh ì! Lunglèn hi tihluih chî a ni lo a, neih luiha tawn luih tum chiam chî pawh a ni nahek lo—amah të hian, a hun têah a lo kal mai a, a hunah tak a rawn ‘rah’ mai thin a ni ngai a! Tum chiam chu hlawhchhamna lek!

Lungléng lui emaw intilungléng lui emaw, lunglèn tum lui emaw thuziak te, hla phuahte hi chuan lung a tiléng pha tak tak ngai lo! Hringnun, kan khawvêl hmu mawitu thuziak te hian lung an tiléng báng lo a; mi lung lénga kun ngawih ngawih hla phuah chhuah hi a ngaihnawm ber fo a, lung a tiawi ber thin—keimahah chuan!