Aizawl: Kum 2017 March thla atanga Lawngtlai District Lungzarhtum Tlangpui khuaa Sele inlar, bawngrual zinga khawsa thin ni ngeia rin chu nimin zing khan Lungzarhtum khaw bulah thi a hmuh a ni a, Sele hi mi tutih hraitloh ten a sa an chan sawm nghal vek avangin leh silai hmanga tih hlum ni ngeia an ngaih avangin Lungzarhtum khawtlang chuan Bualpui (NG) Police Outpost ah FIR an ziaklut lut.
Lawngtlai atanga Zalen thudawn danin Sele ruang hmu hmasatu Lalcheuva Tlangpui khua chuan a Bawng vulh thlithlai tur leh Sele ngaihven tura a kalin, Mulukawlh thlawk leh chung mulukawlh te chu lei lama an bir luh leh thin avanga Bawng thi an awm ngei nih ringin, a han chian a, Lungzarhtum khaw dai ah hian Sele ruang hi a hmu ta a ni. Lalcheuva chuan LADC Forester, Bualpui (NG) a RO Incharge la mektu chu be pawp nghalin, Sele thih thu a hrilh ta a, an ni nen hian Sele hi nguntaka an bihchian thu sawiin, silai a kahna hnuhma leh hliam engmah an hmuh loh thu a sawi bawk.
Hetih lai hian Lungzarhtum khawtlang hruaitute chuan nimin zing dar 7 vel khan Sele ruang hmuhna hnaihah silai puak ri an hriat thu an sawi a, silai a kahhlum ngei nia an ngaih avangin Bualpui (NG) Police Outpost ah FIR an ziaklut a, Sele sa lo chansawm tute pawh an chhuizui nghal bawk.
He ramsial hi mihring kut tuara thi ni a rinhlehna a awm a, hetianga mihring kut tuara thi a lo nih chuan, a pawikhawihtute man chhuah kawnga thuneitute pui theitu apiang hnenah Biodiversity & Nature Conservation Network (BIOCONE) chuan lawmman atan ? 10,000 (Cheng Singkhat) pek an tum.