May 17, 2022; Mizoram Pradesh Congress Committee (MPCC) president Lalsawta'n press statement siamin, an party duhdan hre reng chunga MDCC-a an hotute leh an MDC ten MNF party sawrkar an siampui lui chu an party in a ngai thutak hle tih a tarlang a, 'Show Cause Notice' an pek tur thu leh chumi hnu-ah kal zel dan tur chu an la ngaihtuah tur thu a tarlang bawk.

An party pawimawh thil ti a a zinna, Delhi atanga vawiin a thuchhuah a siamah, MPCC president chuan, MADC-ah INC leh MNF sawrkar a piang tih chu a zinna lam atangin a lo hre ve tih tarlangin, MADC-a MDC thlannaah party mal sawrkar siam thei an awm loh avangin sawlamah party indawr kualna a nasa tih an hriat thu te, chutah chuan MADC area-a an party pawh an bang bik lo tihte an lo hria tih a tarlang a.

"Party hotute ngaihdan hriat an duh thu sawlama kan hotuten an rawn thlen avangin PAC meeting hmanhmawh kan nei nghal a. BJP nen emaw, MNF nen emawa sawrkar intawm siam chu tha kan tih loh thu kan hriattir nghal a. Hetiang hian tum thum kan hrilh bakah, press statement pawh kan siam tawh a. Inthlan result hriat hma pawhin hetianga 'Hung Council' a awm chuan hei hi kan dinna turin PAC chuan a lo rel fel tawh nghe nghe a ni," tiin press statement a siamah chuan a tarlang.

Heti chung hian congress hruai sawrkar, CEM pawh congress MDC ngei awmna Joint congress - MNF legislature sawrkar an siam thu an hre ta mai tih tarlang bawkin, MPCC president chuan, MADC sawrkar a piang hrim hrim chu thil lawmawm a nih thu leh sawrkara chanvo neitu zawng zawng leh Mara ram mipuite pawh an lawmpui tih a tarlang a.

 "Amaherawhchu, party duhdan hre reng chunga MDCC-a kan hotute leh kan MDC ten hetianga sawrkar an siampui lui mai hi kan party chuan a ngai thutak hle a. Loh theih lohvin 'Show Cause Notice' kan pek a ngai dawn a. Chumi hnu-ah kan hotute'n kan kal zel dan tur chu an la ngaihtuah ang," tiin press statement a siamah chuan a tarlang.