Aizawl: Mizoram Pradesh Congress Committee chuan Mara Autonomous District Council-a thuneihna chan ngawr ngawr chu an tum ber a ni lo tih sawiin sawrkar ngialnghet din chu an tum ber (No. 1) a ni tih an sawi.

Nimin khan Aizawl Press Club-ah thuthar thehdarhtute kawmin MPCC thupuangtu Dr. Lalianchhunga chuan, “MADC inthlan neih zawh takah sawrkarna siam tura MDC 13 neih a ngaih laiin majority nei thei kan awm lo a, BJP-in seat 12, MNF-in seat pakua leh INC-in seat li kan la a. Hetianga sawrkarna siam thei kan awm tak loh avang hian BJP leh MNF party chuan sawrkarna siampuiah min sawm ve ve a.  Amaherawhchu, Congress party thuneitu sang, Political Affairs Committee-in ngun taka a ngaihtuah hnuah eng party mah thawhpui loh ni se a ti ta a ni,” a ti.

Dr. Lallianchhunga chuan, “BJP chu sakhaw tih bik nei a nih laiin Congress party chu sakhaw tih bik nei lo, sakhaw tin leh hnam tin lenna a ni. Chuvangin, BJP nena sawrkarna siam dun hrim hrim hi thil tih chi-ah kan ngai lo a. MNF nen MDC 13 chiah chiah neia sawrkarna siam theih niin lang mah se, Autonomous District Council-ah  hian thlan tlin uirete hremna dan, Anti-Defection Law a awm ve loh avangin awlsam taka pheh thluk theih reng a ni dawn a; chuvangin, eptu lama thut hi tha zawkah kan ngai a ni,” a ti. 

Congress MDC pali ten party thuneitu sang thutlukna an zah thiam chu chhuanawm an ti hle tih a sawi bawk.