Aizawl: Mara Autonomous District Council a VC bye election neihah BJP an chak. MADC hnuaia Village Council 5 a seat 13 ruak hnawhkhahnan hian Zirtawpni khan vote thlak a niin vote thlak zawh veleh hian vote chhiar nghal a ni a. Village Council 5 a seat 13 inthlanna ah hian BJP in seat 10 la in MNF in seat 3 an la bawk.

Village Council 5 a inthlanna buatsaihah hian voters 2541 awmin voters 1661 in vote an thlak a, a pumpuia vote thlak zat percentage chu 65.37% a ni. Vote tlak that berna chu Zyhno I niin voter 489 awmah 352 in vote an thlak a, vote tla zat hi 71.98% a ni. Vote tlak chhiatna ber chu College Vaih - II a ni a, voter 1103 awmah 651 in vote an thlak a, 59.02% a tla a ni.

He inthlannaah hian harsatna lian tham thleng a awm lo a, vote thlak chungchang bakah dan leh thupek kenkawh kawngah leh inbiak pawhna lamah pawh District Election Officer leh a thawhpuite, SP, Siaha leh a thawhpuite, Returning Officer-te, Polling Official-te leh Political Party-te inpekna leh thahnem ngaihna avangin inthlanna a felfaiin a muanawm hle tih State Election Commission chuan sawiin he inthlanna tluang taka neih a nih theihna atana mawhphurtu leh tha thawhtu zawng zawngte chungah leh Democracy tihlawhtling tura vote thlaktu mipuite chungah lawmthu a sawi.