10 May; 2022; Mizoram State BJP president Vanlalhmuaka chuan Mara Autonomous District Council (MADC) ah an party in sawrkarna an siam ngei dawn tih ZALEN a hrilh. Hetihlai hian sawrkar siamna tur khawp seat an lak loh avangin party dang atanga thlantlin tu emaw ber Chief Executive Member (CEM) tura an sawm luh rinna lian tak a awm mek.

ZALEN in a biakna ah Mizoram State BJP president chuan MADC inthlan ah tling tam ber an nih vangin sawrkarna an tan siam a har dawn lo tih sawiin, support tu neih a har loh tur thu a sawi a, MNF emaw INC emaw atanga support an dawn tur leh tur loh chungchang erawh engmah sawi theih a la neih rih loh thu a sawi.

Hetihlai hian Siaha atanga ZALEN thudawnna rinawm takin a sawi danin, congress in thawhpui neih loh tur tih thutlukna siam mahse an din reng theih a rinawm loh a, Autonomous District Council (ADC) ah Anti Defection Law a awm loh avangin party ticket a thlantlin te pawh party dangah an zuanglawr thei. 

Tun dinhmuna a lan danin, MADC ah thawhhona sawrkar din lam  a lang lo tih Siaha atanga thudawnna chuan sawi bawkin, "Seat khat chauh mamawh BJP in MNF lam an awn lo hle a, a lan danah BJP in thawhhona sawrkar/sawrkar intawm din ai chuan congress atangin emaw MNF atangin tu emaw ber CEM atan sawm luh a, MADC a BJP kaihhruai sawrkar din chu BJP thil tum ber niin a lang," thudawnna chuan a ti.

MADC a BJP chhung lamah pawh CEM inchuhna a nasa tho nia hriat a nih thu te, hemi vang hian an vaia an pawm theih tur party dang a mi CEM tur sawm luh mai chu BJP lam tan pawh damtlanna ber ni dawn a hriatna te pawh a awm tih thudawnna chuan sawiin, "BJP in CEM atana an sawm luh tur hi MNF atang pawhin a ni thei a, INC atang pawhin a ni thei, tuna thlantlin te mimal dinhmun en chuan INC atanga tling zingah CEM han ni thei tur an awm lutuk lo zawk," a ti bawk.

MADC sawrkar thar hi May 13, 2022 hma a siam turin State Election Commission (SEC) chuan thupek a chhuah tawh a, an in form fel thei lo a nih chuan Governor rules ah an awm ang a, inthlan that huaihawt leh thlengin hmalakna kalpui tur a ni dawn a ni.

BJP in sawrkarna siam turin seat 1 chaih an mamawh laiin, state a rorellai seat 9 latu MNF in seat 4 an mamawh a, seat 4 latu congress in seat 9 an mamawh thung.